Монгол, Узбекистаны худалдаа, эдийн засаг, шинжлэх ухаан, техникийн хамтын ажиллагааны Засгийн газар хоорондын комиссын анхдугаар хуралдаан Ташкент хотноо болж, хоёр улсын салбарын төлөөлөл оролцлоо.

Хуралдааныг Монгол Улсын Шадар сайд С.Амарсайхан, Узбекистаны Ерөнхий сайдын орлогч Ж.Ходжаев нар ахлан удирдаж, хоёр улсын хамтын ажиллагааг өргөжүүлэх хэд хэдэн чухал тохиролцоонд хүрсэн байна.

Талууд хөдөө аж ахуйн гаралтай бүтээгдэхүүний худалдааг нэмэгдүүлэх хүрээнд Монгол Улсаас Узбекистаны зах зээлд арьс, шир, ноос, ноолууран бүтээгдэхүүн экспортлох ажлыг өргөжүүлэхээр тохиролцож, энэ онд Улаанбаатар хотноо “Узбекистан улсад үйлдвэрлэв” үзэсгэлэн худалдааг зохион байгуулахаар болов.

Зам, тээврийн салбарт Монгол, Узбекистаныг холбосон авто коридор, шинэ маршрутыг бий болгох, бараа бүтээгдэхүүний туршилтын тээвэрлэлтийг эхлүүлэхээр ярилцаж, Улаанбаатар-Ташкент чиглэлийн хуваарьт нислэгийг 2024 оны хоёрдугаар хагаст эхлүүлэхээр тохиролцов.

Эрчим хүч, уул уурхай, геологийн судалгаа, ашигт малтмалын хайгуул, олборлолт, баяжуулалтын чиглэлээр хамтын ажиллагааг өргөжүүлэхээр санал нэгдэж, боловсрол, соёл, шинжлэх ухааны салбарт их, дээд сургууль, судалгааны хүрээлэнгүүдийн хамтын ажиллагааг хөгжүүлэх, эрдэм шинжилгээ, соёл урлагийн арга хэмжээг хамтран зохион байгуулахаар тохиролцов.

Мөн Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг Узбекистаны “Ногоон орон зай” төсөлтэй уялдуулан хэрэгжүүлж, жимс, жимсгэнийн модны суулгацыг Монголд нутагшуулах, говийн бүсэд цэцэрлэгжүүлэлтийн загвар аж ахуй байгуулах, шинэ хүлэмжийн аж ахуй хөгжүүлэх болон “Монгол, Узбекистаны найрамдлын цэцэрлэгт хүрээлэн” байгуулах боломжийг судлахаар тохиролцлоо.