УИХ-ын дэд дарга Х.Булгантуяа өнөөдөр “Оюутолгой” ХХК-ийн Гүйцэтгэх захирал Дэйрдрэ Лингенфэлдерийг хүлээн авч уулзлаа.
Уулзалтын үеэр тэрбээр Монгол Улсын Их Хурал НҮБ-аас баталсан 2030 он хүртэлх Тогтвортой хөгжлийн хөтөлбөрийг идэвхжүүлэх зорилгоор 2023, 2024 онд Стэнфордын их сургууль, "Илүү сайхан ирээдүйн төлөө Бан Ги Мүн сан"-тай хамтран Алтай дамнасан тогтвортой байдлын яриа хэлэлцээг амжилттай зохион байгуулсан талаар танилцуулж, уг үйл ажиллагаанд “Оюутолгой” ХХК-ийн хамтран ажилласанд талархал илэрхийллээ.
Мөн тавдугаар сард Монгол Улсын Ерөнхийлөгчийн ивээл дор “Уур амьсгалын өөрчлөлт: Тэрбум мод” сэдвийн хүрээнд Тогтвортой байдлын чуулга уулзалтыг зохион байгуулах талаар мэдээлэл өгч, энэхүү хэлэлцүүлэгт ивээн тэтгэгчээр хамтран ажиллахыг хүслээ.
Х.Булгантуяа энэ жилийн Тогтвортой байдлын чуулга уулзалт нь Ази болон Алтайн бүс нутгийн улс орнуудын бодлого боловсруулагчид, шинжээчид, судлаачдыг нэгтгэх зорилготой гэдгийг онцлов. Хэлэлцүүлэг нь бүс нутгийн түншлэлийн ач холбогдлыг тодотгож, байгаль орчны нийтлэг сорилттой тэмцэх дэлхийн сургамж, шилдэг туршлагад тулгуурлан Ази болон Алтайн бүс нутагт хамтын ажиллагааг хөгжүүлэхэд чиглэнэ.
“Оюутолгой” ХХК-ийн Гүйцэтгэх захирал Дэйрдрэ Лингенфэлдер тогтвортой хөгжлийн зорилтуудыг хэрэгжүүлэхэд Алтай дамнасан тогтвортой байдлын яриа хэлэлцээ чухал үүрэг гүйцэтгэж ирснийг тэмдэглээд, Монгол Улс энэхүү уулзалтыг зохион байгуулахад тууштай манлайлан оролцож буйд талархал илэрхийллээ. Тэрбээр, энэ жилийн уулзалтын агуулга, ач холбогдлыг сайшааж, дэлхийн нийтийн тулгамдсан асуудал болох уур амьсгалын өөрчлөлттэй тэмцэхэд хувь нэмэр оруулах болно гэдэгт итгэлтэй байгаагаа илэрхийлж, гурав дахь удаагаа зохион байгуулах энэхүү хэлэлцээнд хамтран ажиллахдаа таатай байх болно гэж мэдэгдэв.
Эх сурвалж: УИХ-ын Хэвлэл мэдээллийн газар
