Нийслэлийн хог хаягдлын ачилт, тээвэрлэлтийн үйл ажиллагааг сайжруулах зорилгоор 18:00-21:00 цагаас бусад үед хог хаяхыг хориглох шийдвэр гарлаа.
Энэхүү зохицуулалт нь авто замын хөдөлгөөний ачаалалтай уялдуулан хог ачилтыг шөнийн цагаар хийх нөхцөл бүрдүүлж байгаа аж.
Шөнийн цагаар хог ачиж тээвэрлэх шийдвэр
Улаанбаатар хотын захирагчийн ажлын албаны Орчны бохирдол, хог хаягдлын удирдлагын хэлтсийн дарга Б.Мөнх-Эрдэнэ энэ талаар хэлэхдээ:
“Шөнийн цагаар хогийг ачиж тээвэрлэх нь зүйтэй гэж захирамж гарсан. Хог хаягдлын менежментийг сайжруулахын тулд ангилан ялгах, дахивар хогийн савуудыг байрлуулах, хог хаягдлыг зориулалтын машин, техникээр тээвэрлэх ажлуудыг нэгдүгээр улиралд багтаан хэрэгжүүлэхээр ажиллаж байна.”
Тэрбээр иргэдийг машины цонхоор тамхины иш болон бусад хог хаяхгүй байх, зөвшөөрөлгүй газар хог хаяхгүй байх зэрэгт анхаарч, зөрчил гаргасан тохиолдолд харьяа хороо, дүүрэгтээ мэдэгдэн хариуцлагатай хандах хэрэгтэйг онцолсон.
Хог хаях соёлыг төлөвшүүлэх ажлууд
- Цэцэрлэг, сургуулийн насны хүүхдүүдийг хогийг ялгаж хаях дадалд багаас нь сургах
- Зориулалтын саванд хог хаяж хэвших сургалт, зохион байгуулалтын ажлуудыг хэрэгжүүлэх
Чингэлтэй дүүрэг энэхүү менежментийг 14 хоногийн өмнө туршилтаар хэрэгжүүлсэн бөгөөд үр дүнгээ өгч эхэлсэн гэж албаныхан мэдээллээ.
