Төрийн албаны зөвлөлөөс төрийн албаны шинэчилсэн цахим системийг танилцуулах уулзалтыг Татварын ерөнхий газарт зохион байгууллаа.

Шинэчлэлтээр төрийн албанд гарсан хууль бус томилгооны мэдэгдэл цахим системд ирж, орон даяар бүрэн хянах боломж бүрдэж байгаа аж. Мөн төрийн албан хаагч мэргэжил, шаардлага, ур чадвартаа тохирох сул орон тооны мэдээллийг системээр дамжуулан үзэх, сонголт хийх, шалгалтад орох боломжтой болжээ.

Энэ талаар Төрийн албаны зөвлөлийн дарга Л.Цэдэвсүрэн танилцуулахдаа “Төрийн албаны тухай хуульд манай улсад үйл ажиллагаа явуулж буй төрийн алба, албан хаагчдын нэгдсэн тоо бүртгэлийг хөтлөх чиг үүрэг нь манай байгууллагад байдаг. Үүнийг Excel суурьтай хийдэг байсныг 2022 оноос цахим руу үе шаттай шилжүүлж эхэлсэн. Улмаар 2024 оноос дээрх мэдээллийг зөвхөн төрийн байгууллага үздэг байсныг dashboard хэлбэрээр иргэд, олон нийт, төрийн албан хаагчид өөрсдөө танилцдаг болж байна. Түүнчлэн төрийн албан хаагч хүн өөрийнхөө тусгай эрхээр нэвтэрч мэдээллээ шалгадаг, хянадаг, засвар оруулдаг системийг хөгжүүлсэн. Төрийн албан хаагчийн сонгон шалгаруулалтын системийг хөгжүүлж байна. Энэ системээр дамжуулж тухайн хүнд өөртөө тохирох албан тушаалд материалаа өгөх боломж бүрдсэн. Төрийн албан шалгалтад тэнцсэн эсэх, хэн тэнцсэн, ямар шалгуураар тэнцээгүй талаар иргэд нээлттэй мэдэх боломжтой.

Төрд учирсан хохирлыг цаасаар бүртгэдэг байсныг цахим систем рүү оруулсан. Ингэснээр хэзээ, хэн гэх албан тушаалтан ямар хууль бус шийдвэр гаргасан, шүүх хэрхэн эцэслэн тогтоосон гэдгийг харах боломжтой системийг хөгжүүллээ. Шүүхийн тогтоолоор тухайн албан тушаалтан ямар төлбөрийг хэзээ улсад төлөх тухай мэдээллийг системээр дамжуулж харах юм. Энэхүү систем нь төрийн албан тушаалтнуудыг хариуцлагыг өндөржүүлж байна” гэлээ.

Нэгдсэн цахим системийн үндсэн хүний нөөц, суурь платформыг хөгжүүлэх ажил 2020 оноос эхэлсэн ч холбогдох хууль тогтоомжийн өөрчлөлт, техник технологийн хөгжил, бусад системийн интеграцтай уялдуулан шинэ тутам хөгжүүлжээ. 2024 оны хувьд дөрвөн шинэ модуль, хоёр дэд системийн интеграцыг хэрэглээнд нэвтрүүлсэн байна.