/Anadolu/. Ариун Коран судрын хуулбарыг шатаадаг үйлдлээрээ олны анхаарал татсан Салван Момика Швед дэх гэртээ буудуулж амиа алдсан талаар тус улсын төрийн хэвлэл мэдээлэв.

38 настай Салван Сабах Матти Момика нь Шведийн Сёдертелье хот дахь гэртээ нас барсан байдалтай олдсон гэж SVT телевиз мэдээлжээ. Шведийн цагдаагийн газраас мэдээлснээр 40 орчим насны эрэгтэй буудуулсан байдалтай орон сууцанд олдож, яаралтай эмнэлэгт хүргэгдсэн ч амь насаа алдсан байна.

Цагдаагийн мөрдөн шалгалт

Цагдаа нар хүн амины хэргийг мөрдөн шалгаж эхэлсэн бөгөөд Шведийн Ерөнхий сайд Ульф Кристерссон уг хэргийг “олны анхаарлыг татсан хэрэг” гэж тодорхойлжээ.

Мөрдөн байцаалтын явцад гал нээж буй мөчийг олон нийтийн сүлжээгээр шууд дамжуулсан байж болзошгүй гэж Данийн цагдаагийн газраас мэдээлсэн байна.

Салван Момикагийн түүх

Иракийн иргэн, христийн шашинтан С.Момика 2021 онд Шведэд оршин суух зөвшөөрөл авч, түүнээс хойш олон нийтийн газар Коран судар шатаах үйл ажиллагаа зохион байгуулдаг болжээ.

2023 оны зун С.Момика болон Салван Нажем нар дөрвөн удаа Коран судрыг шатаасан бөгөөд үүний улмаас “үндэстний бүлгийн эсрэг суртал ухуулсан” хэрэгт буруутгагдсан байна. Улмаар Шведийн Цагаачлалын агентлаг түүний оршин суух зөвшөөрлийг цуцалж, Норвег рүү явсан ч Швед рүү буцаагджээ.

Коран шатаалт ба олон улсын эсэргүүцэл

Сүүлийн жилүүдэд Швед, Дани улсад "үг хэлэх эрх чөлөө" гэх нэрийдлээр Коран судрыг шатаах үйлдэл гарч, лалын шашинтай орнуудын хүчтэй эсэргүүцэлтэй тулгарсан билээ.

Үүнтэй холбоотойгоор лалын шашинтай орнуудад дипломат төлөөлөгчийн газрууд руу халдлага үйлдэж, эсэргүүцлийн жагсаалууд өрнөсөн юм.

Эдгээр үйл явдлын дараа Дани улс Коран судрын хуулбарыг олон нийтийн газар шатаахыг хориглосон хууль баталж, уг хууль өнгөрсөн арванхоёрдугаар сараас хэрэгжиж эхэлжээ.

Эх сурвалж: Anadolu