Сонгинохайрхан дүүргийн Гамшгийн эрсдэлийг бууруулах орон нутгийн зөвлөл хуралдаж, 2025 онд хэрэгжүүлэх ажлын төлөвлөгөөг баталжээ.
Өнгөрсөн арванхоёрдугаар сард зохион байгуулсан “Гамшгаас урьдчилан сэргийлэх анхдугаар зөвлөгөөн”-ий үеэр иргэд, алба хаагчдаас гамшиг, ослын үед яаралтай тусламжийн автомашин нэвтрэхэд саад болдог мухар гудамж, хаалт, хашлага, объектуудыг чөлөөлөх шаардлагатай талаар санал гаргасан байна.
Энэ хүрээнд Сонгинохайрхан дүүргийн Гамшгийн эрсдэлийг бууруулах орон нутгийн зөвлөлөөс 2025 оныг “Зам, орц, гарц чөлөөлөх жил” болгон зарлаж, үерийн далан сувгийн хамгаалалт, халиа дошин үүсдэг газарт суурьшсан айлуудыг үе шаттайгаар нүүлгэн шилжүүлэх зэрэг ажлуудыг хийхээр төлөвлөжээ.
ИТХ-ын дарга Б.Золбоо энэ талаар,
"Ямар нэгэн эрсдэл үүсэхэд онцгой байдал, эмнэлэг, цагдаа, яаралтай тусламжийн автомашинууд саадгүй нэвтрэх ёстой. Гэвч сүүлийн жилүүдэд орон сууцны хорооллууд гаднаа хаалт хийж, гудамж, замыг мухарлаж, төлбөртэй зогсоол нэрээр хаалт барих тохиолдол ихэссэн. Энэ байдлыг цэгцлэх шаардлагатай. Мөн мал аж ахуй эрхэлдэг хороодод зуд, үерийн эрсдэл нэмэгдэж буйг одооноос ярих цаг нь болсон” гэж онцолжээ.
