УИХ-ын намрын чуулганы хугацаанд Нийгмийн бодлогын байнгын хороо эрхлэх асуудлынхаа хүрээнд нийт долоон удаа хуралдаж, найман асуудлыг хэлэлцэн, гурван хуулийн төсөл, нэг УИХ-ын тогтоолыг батлуулжээ.

Мөн байнгын хорооноос хоёр тогтоол хэлэлцэж баталсан бөгөөд яам, агентлаг, харьяа байгууллагын гурван мэдээлэл, тайланг сонссон байна. Хууль санаачлагчдаас УИХ-д өргөн мэдүүлсэн төслүүдийг хэлэлцүүлэгт бэлтгэх хүрээнд гурван санал дүгнэлт гаргаж, байнгын хорооны болон нэгдсэн хуралдааны анхны хэлэлцүүлэгт зарчмын зөрүүтэй 21 саналын томьёолол бэлтгэсэн байна.

Нийгмийн бодлогын байнгын хорооны дарга, гишүүд чуулганы хугацаанд нийгмийн хамгаалал, халамж, эрүүл мэнд, хүний хөгжил, хүн амын бодлого, хөдөлмөрийн зах зээлийн салбарын асуудалд анхаарч, төв болон орон нутгийн байгууллагууд, үйлчилгээ эрхлэгчдийн үйл ажиллагааг судлах, хянан шалгах, тулгамдаж буй асуудлууд, сорилт бэрхшээлийг тодорхойлоход онцгой ач холбогдол өгчээ.

Тухайлбал, Гэр бүл, хөдөлмөр, нийгмийн хамгааллын болон Эрүүл мэндийн яам, Сэтгэцийн эрүүл мэндийн үндэсний төв, Сэлэнгэ аймгийн Мандал сумын Нэгдсэн эмнэлэг, Дархан-Уул аймгийн Ахмадын хөгжлийн төв, Баянхонгор аймгийн Хүүхдийн гэр цэцэрлэг, Говь-Алтай, Ховд аймгийн Хүүхэд хамгааллын төв, Ховд аймгийн Бүсийн оношилгооны төв, тус аймгийн Үенч сумын Хилийн цэргийн 0130 дугаар ангийн дэргэдэх хүүхдийн цэцэрлэг зэрэг байгууллагын үйл ажиллагаатай танилцаж, салбарын эрх зүйн шинэчлэл, өөрчлөлтийг танилцуулж, батлагдсан хууль тогтоомжийг сурталчилжээ.