Швейцарын Лозанна хотод өнөөдөр эхлэх Олон улсын Олимпын хорооны (ОУОХ) 143 дугаар чуулганы үеэр тус байгууллагын ерөнхийлөгчийн албан тушаалд нэр дэвшигчид өөрсдийн мөрийн хөтөлбөрөө танилцуулах гэж байна.

Ерөнхийлөгчийн суудлын төлөө Их Британийн хөнгөн атлетикийн холбооны тэргүүн Себастьян Коу, Зимбабвегийн усанд сэлэлтийн олимпын аварга Кирсти Ковентри, Испанийн бага Хуан Антонио Самаранч, Иорданы Фейсал аль-Хусейн, Францын дугуйн холбооны тэргүүн Давид Лапартьян, Японы Моринари Ватанабэ, Их Британийн цанын холбооны ерөнхийлөгч Йохан Элиаш нар өрсөлдөж байна.

Нэр дэвшигчид тус бүр 15 минутын хугацаанд мөрийн хөтөлбөрөө танилцуулах бөгөөд эхний илтгэлийг Фейсал аль-Хусейн, хамгийн сүүлд Себастьян Коу тавих юм. Үүний дараа нэр дэвшигчид сэтгүүлчдийн асуултад хариулна.

Сонгуульд өндөр магадлалтай нэр дэвшигчид

ОУОХ-ны дэд ерөнхийлөгч бага Хуан Антонио Самаранч байгууллагын санхүүгийн тогтвортой байдлыг хангах, ивээн тэтгэлгийг өргөжүүлэх чиглэлд анхаарал хандуулж байгаа бол Кирсти Ковентри тамирчдын эрхийг хамгаалах асуудлыг гол зорилгоо болгожээ.

Олон улсын хөнгөн атлетикийн холбооны ерөнхийлөгч Себастьян Коу хамгийн өндөр магадлалтай нэр дэвшигчээр нэрлэгдэж байна. Тэрбээр 2012 оны Лондонгийн Олимпыг зохион байгуулахад гол үүрэг гүйцэтгэснээс гадна хөнгөн атлетикийн холбооны шинэчлэлийг амжилттай хэрэгжүүлсэн. Гэвч ОУОХ-ны 70 насны дээд хязгаар түүнд асуудал үүсгэж болзошгүй байгаа аж.

ОУОХ-ны ерөнхийлөгчийг сонгох санал хураалт гуравдугаар сарын 20-нд Грект болох бөгөөд сонгогдсон шинэ тэргүүн зургаадугаар сарын эцсээр албан ёсоор үүрэгт ажилдаа орох юм.

Эх сурвалж: ТАСС