2025 оны нэгдүгээр сарын 28-ны өдөр “Тамхины хяналтын тухай хуулийн хэрэгжилт, тулгамдаж буй асуудал” сэдэвт хэлэлцүүлэг, зөвлөгөөн хоёр дахь өдрөө Төрийн ордонд үргэлжилж байна. Энэхүү арга хэмжээг УИХ-ын даргын 110 дугаар захирамжаар байгуулагдсан ажлын хэсэг, Эрүүл мэндийн яам, Дэлхийн эрүүл мэндийн байгууллагын (ДЭМБ) Монгол дахь суурин төлөөлөгчийн газар хамтран зохион байгуулж байгаа бөгөөд тамхины хяналтыг сайжруулах, хэрэглээний хор хөнөөлийг бууруулах зорилготой юм.

Өнөөдрийн зөвлөгөөнийг нээж, УИХ-ын гишүүн, ажлын хэсгийн ахлагч О.Номинчимэг үг хэлж, тамхины хяналтын хуулийн хэрэгжилт, тулгамдаж буй асуудлуудыг шийдвэрлэхэд энэ хэлэлцүүлэг чухал үүрэг гүйцэтгэхийг онцлов. Тэрбээр, тамхины татварын бодлогыг шинэчлэх, электрон тамхи болон никотин агуулсан бүтээгдэхүүнтэй холбоотой харилцааг хуульчлах, тамхи татах тусгай цэгүүд болон хориглосон газруудад хяналт, хариуцлагыг сайжруулах шаардлагатай гэж тэмдэглэжээ.

Дэлхийн эрүүл мэндийн байгууллагын Тамхины хяналтын суурь конвенцын нарийн бичгийн дарга нарын газрын дарга Др. Адриана Бланко илтгэлдээ, тамхины эсрэг хууль тогтоомжийг мөрдүүлэх хүчин чадал, зохион байгуулалтыг сайжруулах нь чухал гэж онцлов. Тэрээр, электрон тамхийг шууд хориглох нь зарим тохиолдолд илүү үр дүнтэй бөгөөд тамхины хор хөнөөлийг ойлгуулахад анхаарах хэрэгтэй гэв.

Мөн энэ үеэр ДЭМБ-ын Номхон далайн баруун бүсийн төвийн Халдварт бус өвчний урьдчилан сэргийлэлтийн хэлтсийн зохицуулагч Ши Йин Монгол Улс тамхигүй орчин бүрдүүлэх бодлогын арга хэмжээг эрчимжүүлэх шаардлагатай байгааг онцолсон. Австрали Улсын Эрүүл мэндийн яамны Тамхи, электрон тамхины хяналтын албаны нарийн бичгийн дарга Кэрли Браун тамхины цулгуй савалгаа болон сурталчилгааг хориглох бодлогоо танилцуулж, энэ туршлага нь Монголд хэрэгжих боломжтойг дурдсан.

Хэлэлцүүлэг үргэлжлэн, тамхины татварын бодлого, нийгмийн эрүүл мэндийг хамгаалах арга хэмжээнүүдийн талаар дэлгэрэнгүй ярилцаж, ДЭМБ-ын зөвлөмж болон Филиппин Улсын татварын шинэчлэлийн туршлагыг танилцуулсан. Монгол Улсад тамхины татварыг нэмэгдүүлж, нийгмийн эрүүл мэндийг хамгаалах чиглэлээр авч хэрэгжүүлж буй ажлуудын талаар Сангийн яамны Татварын бодлогын газрын ахлах мэргэжилтэн Т.Анхбаяр илтгэл тавьжээ.

Хэлэлцүүлэг асуулт, хариултаар үргэлжилж, оролцогчид тамхины хяналтын талаар санал бодлоо солилцож байна.

Эх сурвалж: УИХ-ын Хэвлэл мэдээллийн газар.