Улаанбаатар хотын авто замын түгжрэлийг бууруулах ажлын хүрээнд нийслэлийн удирдлагууд трамвай буюу хөнгөн галт тэрэгний төслийг хэрэгжүүлэхээр ажиллаж байна. Төслийн хүрээнд хоёр үндсэн шугамыг төлөвлөсөн бөгөөд эдгээрийн техник, эдийн засгийн үндэслэл (ТЭЗҮ) болон загвар зургийг боловсруулж байна.
Трамвайны шугамуудын чиглэл:
- Эхний шугам: Нисэхийн тойргоос эхлэн Яармагийн авто зам, 120 мянгатын уулзвар, Энхтайваны гүүрээр дамжин Сүхбаатарын талбай хүртэл үргэлжилнэ.
- Хоёрдугаар шугам: Сүхбаатарын талбайгаас Зунжин хүртэлх чиглэлээр, зуслангийн бүсийг хотын төвтэй холбохоор төлөвлөсөн.
Хотын дарга Х.Нямбаатарын мэдээлснээр, газар чөлөөлөлтийн нөлөөлөл багатай эхний шугамын ТЭЗҮ 2025 оны дөрөвдүгээр сард дуусах төлөвтэй байна. Хоёрдугаар шугамын хувьд, газар чөлөөлөлтийн бэлтгэл ажлыг хийж байгаа аж.
2023 оны арванхоёрдугаар сард батлагдсан "Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хууль"-ийн хүрээнд Газрын тухай хуульд тодорхой өөрчлөлтүүд орсон. Эдгээр өөрчлөлтийн дагуу, нөлөөлөлд өртсөн айлуудын 70 хувь нь зөвшөөрсөн тохиолдолд үлдсэн 30 хувийн газрыг жишиг үнээр чөлөөлөх эрх зүйн зохицуулалт хэрэгжиж байна. Ингэснээр Улаанбаатар хотод бүтээн байгуулалттай холбоотой газрын маргааныг шийдвэрлэх боломж бүрдэж байгаа юм.
Трамвайны давуу талууд:
- Байгаль орчинд ээлтэй: Эрчим хүчний хэмнэлттэй, байгальд сөрөг нөлөө багатай.
- Зорчигчийн багтаамж: Нэг удаад 150-300 зорчигч тээвэрлэх боломжтой.
- Хурд: Дундаж хурд нь 30 км/цаг, дээд хурд 60 км/цаг.
Тооцоолсноор, Яармагаас Сүхбаатарын талбай хүртэл трамвайгаар 20-30 минутын дотор хүрэх боломжтой бөгөөд энэ нь замын хөдөлгөөний дундаж хурдыг 25.7 хувиар нэмэгдүүлэхээр байна.
Мөн Энхтайваны гүүрээр трамвай дамжин өнгөрөх учраас гүүрийг хүчитгэх, явган хүний замыг өргөтгөн сайжруулах ажлууд хийгдэхээр төлөвлөжээ. Үүнээс гадна, Гурвалжингийн гүүрийг мөн хүчитгэн бэхжүүлэхээр ажиллаж байна. Улаанбаатар хотод олон түвшний авто замуудыг барьж, олон төрөлт тээврийн хэрэгслийг нэвтрүүлэхээр зорьж байна.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
Сэтгэгдэл (1)