2025 оны 1-р сарын 23-нд Монгол Улсын Шадар сайд С.Амарсайхан Онцгой байдлын байгууллагын удирдах ажилтны цугларалтад оролцож, холбогдох үүрэг чиглэлийг өглөө. Тэрбээр “Монгол Улсын Засгийн газрын 2024-2028 оны үйл ажиллагааны хөтөлбөрт “Үндэсний сөрөн тэсвэрлэх чадавхад дэмжлэг үзүүлэх чиг үүрэг бүхий үндэсний тогтолцоог бий болгох” зорилтыг дэвшүүлж, сөрөн тэсвэрлэх чадавхыг нэмэгдүүлэх, эрсдэлийн удирдлагын реформ хийх арга хэмжээг төлөвлөн, хэрэгжүүлж эхэлсэн. Үндэсний сөрөн тэсвэрлэх чадавхын нэг бүрэлдэхүүн хэсэг нь гамшгийг сөрөн тэсвэрлэх чадавх юм” хэмээн онцоллоо.
Тэрээр мөн улс орнуудын туршлагаас харахад, гамшгийг сөрөн тэсвэрлэх стратеги бүхэлдээ төрд төвлөрсөн үүрэг, хариуцлага, хүч хэрэгслийг бүс, орон нутагт тэнцвэржүүлэн шилжүүлж, аливаа гамшиг, эрсдэлээс урьдчилан сэргийлэх, даван туулахад бүх нийтийн оролцоог нэмэгдүүлэхэд чиглэж байгааг дурдсан юм. Тэрбээр “Манай улсын хувьд газарзүйн байршил, байгаль цаг уур, нийгэм, эдийн засгийн чадварын хувьд ялгаатай нутаг дэвсгэр, засаг захиргааны онцлогтой учир сөрөн тэсвэрлэх чадавхыг бүсчилсэн хөгжлийн бодлогын хүрээнд бүс, орон нутгийн онцлогтой уялдуулах нь илүү үр дүнтэй” гэдгийг онцолжээ.
Мөн тэрээр бүс, орон нутагт явагдах аливаа бүтээн байгуулалтын төлөвлөлт, мега төслүүд гамшгийн эрсдэлийн мэдээлэлд суурилсан, эрсдэлийг тооцсон байх шаардлагатайг дурдаад, орон нутгийн удирдлагууд болон шийдвэр гаргагчдад гамшгийг сөрөн тэсвэрлэх чадавхыг бэхжүүлэхийн ач холбогдлыг ойлгуулах, тэдгээрийг бодит, шуурхай мэдээллээр хангаж, мэргэжил арга зүйн дэмжлэг үзүүлэх нь Онцгой байдлын байгууллагын үүрэг болохыг тодотгосон байна.
Цаашлаад, Шадар сайд орон нутгийн Онцгой комисс, Гамшгийн эрсдэлийг бууруулах зөвлөл, гамшгаас хамгаалах алба, мэргэжлийн анги болон төрийн байгууллагуудын удирдлагуудад дараах үүрэг чиглэлүүдийг өглөө:
-
Засгийн газрын 2024-2028 оны үйл ажиллагааны хөтөлбөр, “Онцгой байдлын байгууллагын стандарттай хөгжлийн стратеги 2030”-ийн зорилтууд болон Онцгой байдлын ерөнхий газрын стратеги төлөвлөгөө 2025-2028-ний хэрэгжилтийг хангах.
-
2023-2024 оны өвөлжилт, хаваржилтын хүндрэлийг хохирол багатай даван туулах зорилгоор ган зудын үнэлгээг урьдчилан төлөвлөн хийж, эрсдэлийн зураглалыг боловсруулах.
-
Салбар хоорондын шийдвэр гаргах үйл ажиллагаа, зохицуулалтыг оновчтой зохион байгуулж, эрсдэлийн мэдээлэлд суурилсан гамшгаас хамгаалах удирдлага, хариу арга хэмжээг төлөвлөн ажиллах.
-
Онцгой байдлын байгууллагын удирдлага, алба хаагчдын ёс зүй, сахилга хариуцлага, мэргэжлийн ур чадварыг сайжруулах, нийгмийн баталгааг хангах.
Шадар сайдын хэлснээр эдгээр арга хэмжээ нь гамшгийг сөрөн тэсвэрлэх чадавхыг бэхжүүлэх, улмаар эрсдэлийг бууруулахад чухал ач холбогдолтой юм.
Эх сурвалж: Онцгой байдлын ерөнхий газар
