Улаанбаатар хотод 2025 оны цэргийн бүртгэл энэ долоо хоногийн сүүлээр буюу нэгдүгээр сарын 22-нд дуусах гэж байна. Монгол Улсын цэргийн үүрэгтэн болох 18-50 насны иргэд, 65 хүртэлх насны бэлтгэл офицерууд, мөн цэргийн бүртгэлтэй мэргэжил эзэмшсэн эмэгтэйчүүд энэ бүртгэлд хамрагдах үүрэгтэй.
Бүртгэлд хамрагдах арга замууд:
- Цахимаар бүртгүүлэх: Иргэд "E-Mongolia" системд нэвтэрч, хайлтын хэсэгт "Цэргийн бүртгэл" гэж оруулан бүртгүүлэх боломжтой.
- Өөрийн биеэр бүртгүүлэх: Цахим бүртгэл хийх боломжгүй иргэд харьяа баг, хорооны цэргийн штабт очиж бүртгүүлэх бөгөөд иргэний үнэмлэх, цэргийн үүрэгтний үнэмлэх (хэрэв байгаа бол) авчрах шаардлагатай.
Цэргийн үүрэгтний үнэмлэх аваагүй 18 нас хүрсэн иргэд болон шилжилт хөдөлгөөн хийсэн иргэд оршин суугаа аймаг, дүүргийнхээ цэргийн штабт бүртгэлээ баталгаажуулах ёстой. Мөн бүртгэлээ хугацаандаа хийлгээгүй иргэдэд зөрчлийн тухай хуулийн дагуу хариуцлага хүлээлгэхийг анхааруулж байна.
Иргэд хугацаандаа багтаж бүртгэлдээ хамрагдана уу.
