Эрдэнэт үйлдвэр" ТӨҮГ-ын ерөнхий захирал Г.Ёндон болон төрийн өндөр албан тушаалтнууд 24,500 иргэний эрх ашгийг хохироож, "Зэс эрдэнийн хувь" ХХК-ийн үйл ажиллагааг зохион байгуулалттайгаар зогсоож байгаа талаар ахмадууд өнөөдөр "Монгол ньюс" мэдээллийн төвд мэдээлэл хийлээ. 

Тэд "Эрдэнэт үйлдвэрийг тойрсон мафийн сүлжээ байна. Бид хувьд Эрдэнэтэд очиж ажиллаж байсан илгээлтийн анхны эзэд. Ерөнхийлөгч У.Хүрэлсүх, Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатар, Төрийн өмчийн бодлого зохицуулалтын хорооны дарга Б.Цэнгэл нарт хандаж, албан тоот хүргүүлэхээр ирээд байна. 

Эрдэнэт үйлдвэрийн 49 хувийг зүй бусаар эзэмшиж байсан бүлэглэлээс үйлдвэрээ аврах санаачилгыг гарган, бид олон удаагийн тэмцэл хийсэн. "Эрдэнэт үйлдвэр" ТӨҮГ-тай 2015 онд 20 жилийн хугацаатай гэрээ байгуулан ашиглах болсон хоёр овоолгыг тус үйлдвэрийн ерөнхий захирал Г.Ёндон, Уул уурхай, хүнд үйлдвэрийн сайд Ж.Ганбаатар нар төрд эргүүлэн авна хэмээн "Зэс эрдэнийн хувь" ХХК-ийн хэвийн үйл ажиллагааг 2023 он гарсаар хоёр удаа тасалдуулсан. Улмаар хүдэр тээвэрлэлтийг зогсоосон. 

Энэ талаар 24,500 иргэдийн төлөөлөл тус үйлдвэрт санал хүсэлтээ удаа дараа илэрхийлж байна. Гэтэл бидний хүсэлтийг авч хэлэлцэхгүй байсан тул "Эрдэнэт үйлдвэр" ТӨҮГ-ын гэрээт цагдаагийн албаны хамгаалалтын цагдаа нартай тэмцэлдсэн. Тэд иргэдтэй зүй бусаар харьцаж хүчирхийлсний улмаас 10 гаруй ахмад аймгийн бүсийн оношилгоо, эмчилгээний хүлээн авах тасагт хавирга нь хугарч, ахар сүүл нь гэмтсэн, даралт ихэссэн байдалтай хүргэгдсэн. Ингэж тэмцсэний эцэст 2022 оны наймдугаар сарын 17-ны өдөр хүдэр тээвэрлэлтийн үйл ажиллагааг хоёр сар явуулахаар болсон" хэмээв. 

Түүнчлэн "Бидний "Зэс эрдэнийн хувь" ХХК нь Эрдэнэт үйлдвэртэй 20 жилийн хугацаатай гэрээг үндэслэн банкны зээл авч, хөрөнгө оруулагч татан оролцуулж үйлдвэрээ барьсан. Эрдэнэт үйлдвэр 100 хувь төрийн өмчит болонгуут иргэдийнхээ халаасанд яагаад гар хүрэх болов. Үүний цаана хэн байна вэ гэсэн асуулт зүй ёсоор гарч ирж байна. 

Ерөнхийлөгчийн Тамгын газрын дарга Я.Содбаатарын ах Я.Сод-Эрдэнэ нь эхнэрийхээ дүү н.Отгонбаяраар дамжуулан түүний найз болох Ч.Мөнхжаргал нь "Зэс эрдэнийн хувь" ХХК-ийн 28 хувийг эзэмшиж байна. Бид энэ хүмүүсийг Ерөнхийлөгч У.Хүрэлсүхийн нэрийг барьж дээрх хувийг эзэмшиж байж болзошгүй хэмээн хардаж байна. 

Мөн Я.Сод-Эрдэнэ Хөгжлийн Банкны дэд захирлаар ажиллаж байхдаа  "Зэс эрдэнийн хувь" ХХК-ТУЗ-ийн даргад 4.1 тэрбум төгрөгийн зээл олгосон байдаг. Хэрэг үүсгээд шалгасан ч хэрэгсэхгүй болгон цагаатгасан. Эдгээр хүмүүс "Зэс эрдэнийн хувь" ХХК-д хөрөнгө оруулаагүй мөртлөө ямар аргаар компанид хувь эзэмшдэг шалтгааныг тогтоолгохыг хүсэж байна. 

Төрийн нэрийг барьж, хувьцаа эзэмшигч 24,500 иргэний эрхэд ноцтой халдаж байгаа "Эрдэнэт үйлдвэр" ТӨҮГ-ын ерөнхий захирал Г.Ёндон, Уул уурхай, хүнд үйлдвэрийн сайд Ж.Ганбаатар нарыг шалган үүрэгт ажлаас нь чөлөөлөхийг хүссэн албан бичгээ хүргүүлж байна" гэв.