Ардчилсан Намын удирдлагууд өнгөрсөн долоо хоногт болсон Үндэсний бодлогын хорооны хурлаас гарсан шийдвэрүүд болон цаг үеийн асуудлаар мэдээлэл хийлээ.
АН-ын Тэргүүн дэд дарга С.Баярцогт "Монголын улс төрийн намын амьдралд гурван том хуулиар өөрчлөлт орж байгаа. Тухайлбал, Үндсэн хуульд өөрчлөлт орж УИХ-ын гишүүдийн тоог 126 болгосон. Сонгуулийн холимог систем орж ирсэн. Мөн Улс төрийн намын тухай хууль батлагдсан.
Энэ хоёр хууль батлагдсантай холбоотойгоор манай намын Үндэсний бодлогын хороо 504 гишүүнтэй болж байгаа. Их хурлын дараа ордог бодлого боловсруулдаг байгууллага. Анх удаагаа энэ хэмжээний бүрэлдэхүүний хүрээнд хурал явагдсан. Улс төрийн зөвлөл бол 50 орчим гишүүнтэй бодлогын том байгууллага болж байгаа. Намын дарга Улс төрийн зөвлөлийг удирдана гэсэн дүрэм байдаг ч намайг ахалж авч явахыг хүссэн.
Ардчилалын хоёр дахь давлагааг эхлүүлж байна. Намын анхдагч нар 2024 оны сонгуулиар байр сууриа хоёр дахь үеийнхэндээ шилжүүлж байгаа. Үүнийг намынхан ардчиллын дахин сэргэн мандалтын эхлэл гэж харж байна. 1980, 1990 оныхон АН-ын удирдлагад шинээр орж ирж байгаа. Энэ нь бодлогын хувьд томоохон өөрчлөлт болно.
Манай улсын 33 жилийн түүхийн хугацаанд нэг нам үнэмлэхүй ялалт авсан тохиолдол нь өнгөрсөн сонгууль байсан. Ийм байдал удаан үргэлжилж, бодитой сөрөг хүчингүй байвал манай улс аажимдаа авторитар тогтолцоонд шилжинэ. Тиймээс одоогийн АН-ын гишүүд, удирдлагууд хариуцлагатай байх шаардлагатай байгаа юм.
АН, ардчиллын төлөөх намууд эв нэгдэлгүй байх үедээ ялагдал хүлээдэг. Харин одоо та бүхэн шинэчлэгдэж байгаа, шинэ АН-ын тухай ярих болно" гэлээ.
