УИХ-ын чуулганы өнөөдрийн нэгдсэн хуралдаанаар Монгол Улсын Үндсэн хуульд оруулах өөрчлөлтийн төслийн гурав дахь хэлэлцүүлгийг хийлээ. 

Үндсэн хуулийн нэмэлт өөрчлөлтийг хэлэлцэхдээ нийт гишүүний ирц 75 хувиас доошгүй байх ёстой байдаг. Тэгвэл Үндсэн хуулийн нэмэлт өөрчлөлтийн гурав дахь хэлэлцүүлгийг 60 гишүүний ирцтэй хэлэлцэв.

Үндсэн хуулийн 21 дүгээр зүйлийн 1 дэх хэсэгт "УИХ нэг танхимтай, 126 гишүүнтэй байна. УИХ-ын сонгуулийг холимог тогтолцоогоор явуулна. УИХ-ын 78 гишүүнийг олныг төлөөлөх, 48 гишүүнийг хувь тэнцүүлэн төлөөлөх аргаар сонгоно" хэмээн тусгасан.

Үндсэн хуульд оруулах өөрчлөлтийн төслийг бүхэлд нь батлах талаар санал хураалт явуулахад 62 гишүүн буюу 91.2 хувийн саналаар дэмжлээ.

Ийн Монгол Улсын Үндсэн хуульд оруулах өөрчлөлтийн төслийг баталж 2024 оны парламентыг 126 гишүүнээр бүрдүүлэх шийдвэр гаргалаа. Тойргоос 78 гишүүн, намын жагсаалтаас 48 гишүүн сонгогдож парламентад ажиллана.

Дашрамд, УИХ-ын гишүүн Н.Учрал, Б.Дэлгэрсайхан, Ж.Батсуурь нар Үндсэн хуульд өөрчлөлт оруулах санал хураалтаас хоцорсон байна. Тэдний картаа шургуулсан автомат төхөөрөмж ирцийг нь бүртгэж “татгалзсан”-аар тооцжээ. Харин УИХ-ын гишүүн Д.Цогтбаатар дэмжсэнийг дарсан ч төхөөрөмж нь татгалзсанаар бүртгэсан байна. Бие даагч С.Ганбаатар, Барилга хот байгуулалтын сайд Ц.Даваасүрэн нар татгалзсан санал өгчээ.