Гадаад хэргийн яам хамтын ажиллагаатай улс орнууд руу олон улсын харилцааны мэргэжилтнийг хоёр яамны хоорондын  гэрээ хэлэлцээрийн дагуу тухайн улсад нь бэлтгээд удаж байгаа аж.

Тухайлбал, ОХУ-ын Москва хотын Олон улсын харилцааны сургуульд жил бүр манай улсаас цөөнгүй хүүхэд суралцдаг бөгөөд шалгалтыг нь ГХЯ-ны хурган дарга нар авдаг байна.  Энэ жилийн Москвагийн Олон улсын харилцааны сургуулийн шалгалтыг  тус яамны Төрийн захиргаа удирдлагын газрын дэд захирал Д.Амарсайхан,  зөвлөх А.Гэрэлмаа болон Хөрш орнуудын газрын захирал Б.Болор нар авчээ.

Гэтэл ерөнхий боловсролын сургуулиа алтан медальтай төгсч буй унаган орос, англи хэлтэй хүүхэд шалгалтандаа унаж,  орос хэлний мэдлэгээ ч бүрэн эзэмшиж чадаагүй сурлага тааруу хүүхдүүд тэнцсэн нь эцэг эхчүүдийг гайхахад хүргэсэн байна. Зарим эх сурвалжийн хэлснээр, дээрх шалгалтыг зохион байгуулалттайгаар  луйварддаг, шалгалтын тест нь задардаг гэх яриа жилийн жилд гардаг боловч яамны удирдлагууд ямар ч арга хэмжээ авдаггүй гэх.

Тиймээс олон жил тус яаманд амь бөхтэй оршиж, танил талынхаа хүүхдүүдийг тэнцүүлдэг энэ ужгирсан асуудлыг зогсоохоор шалгалтанд орсон хүүхдүүдийн эцэг, эхчүүд АТГ-т  хандахаар болсон байна. Ингэхдээ яамны зүгээс шалгалтанд орсон хүүхдүүдийн дүнгийн мэдээллийг ил болгодоггүйг харгалзан сүүлийн таван жилийн хугацаанд явуулсан шалгалт, шалгалт авсан албан тушаалтнуудыг АТГ-т өгч шалгуулна гэв.