Өчигдөр “Х.Баттулгын” гэгддэг хоёр дахь АН-ын ҮБХ цахимаар хуралджээ. Тус хуралд оролцсон намын зарим гишүүд, тухайлбал СХД-ийн намын дарга н.Очирбат АН-аас салж тусдаа нам байгуулах санал гаргасан юм байна. Энэ саналыг нь тус намын ерөнхий нарийн бичгийн дарга И.Мөнхжаргал нарын хүмүүс сайшаасан тухай дотоод мэдээлэлтэй ойр эх сурвалж мэдээллээ.

н.Очирбат нь анх АЗХ-ны тэргүүн асан С.Эрдэнэболдыг дагаж, намын дэргэдэх залуучуудын байгууллагаар дамжин АН-д хөл тавьсан байдаг. Намд орж ирсэн даруйдаа СХД-ээс УИХ-ын сонгуульд нэр дэвших эрхийг АН-ын дарга С.Эрдэнээс авч чадсан сүйхээтэй эр. Зуун саяыг бэлнээр төлж сонгуульд өрсөлдөх эрхээ авсан бийлэгжүү энэ эрийг АН-д олон жил улс төрийн ажилд зүтгэсэн залуус нь “ямар ч үнэт зүйл, үзэл баримтлалгүй, оппортунист нөхөр” гэцгээдэг. Тэр нь ч 2020 оны сонгуулийн дараачаас шууд “Жэнко” Баттулгыг дагаснаар тодорхой болсон. Тиймээс дүүргийн намын дарга хүн ҮБХ-ныхоо хурлын үеэр шинэ нам байгуулах санал гаргасан нь санамсаргүй хэрэг биш болов уу.

Мөн түүнчлэн, шинэ нам байгуулах санал гаргасан явдал нь АН-ынхны хувьд хоёр томоохон үйл явдалтай давхцаж байгаа нь сонирхол татна. Эхнийх нь шинэ цагт дахин гарч ирсэн хуучин хүн С.Баярцогт. С.Баярцогт улс төрд эргэн ирснээ зарласан нь АН-ынхны дунд өргөн хүрээтэй, шүүмжлэл дагуулсан хэлэлцүүлэг болж хувираад байгаа. Намын гишүүдийн зарим нь С.Эрдэнээс АН-ын тамгыг авч чадах хүн нь Баярцогт гэцгээж байгаа бол нөгөө хэсэг нь “Баярцогт бол шинэ хүн биш. Энэ хүн АН-ын дарга болбол 2024 оны сонгуульд нам ялах боломжоо алдана” гэдэг. Үүнээс ч илүү сонирхолтой нь түүний эсрэг танил технологиор хийгдсэн нэвтрүүлгүүд ар араасаа гарч эхэлснээс үзвэл С.Баярцогтын эсрэг хэн зогсож байгаа нь илт. Нэвтрүүлгүүдийг захиалагч нь түүнийг намын дарга болох вий гэдгээс айдастай яваа нэгэн байх нь ойлгомжтой.

Нөгөө үйл явдал нь И.Мөнхжаргал нарын дээд шүүхэд гаргасан АН-ыг итгэмжлэхгүйгээр төлөөлөх этгээдээр И.Мөнхжаргалыг бүртгүүлэх хүсэлтэд Дээд шүүх татгалзсан хариу өгсөн явдал юм. Эндээс үзвэл дээд шүүх Х.Баттулгын тэргүүлж байгаа АН-ын эрх барих байгууллага буюу ҮБХ-г эрх зүйн чадамжгүй хэмээн дүгнэсэн байна.  

Энэ хоёр үйл явдалтай давхцан гарсан АН-аас тусгаарлаж, шинэ нам байгуулах тухай Х.Баттулгын талынхны санал санаачилга, ҮБХ-ны шийдвэр болж албажаагүй ч сайшаасан хандлагатай хүлээн авсан зэрэг нь АН албан ёсоор хоёр хуваагдах боломжийг харуулж байна. Өнгөрсөн хоёр жил гаруйн хугацаанд шуудайд хийсэн үхрийн эвэр мэт харгалдаж явсан АН-ынхан жинхэнэ утгаараа үзэл баримтлал, үнэт зүйлсээрээ ялгарах “сайн цагийн” үүд нээгдэж байгаа ч юм билүү, хэн мэдлээ.

Ч.ГАРЬД