Ерөнхий сайд Л.Оюун-Эрдэнэ танхимынхаа бүтэц, бүрэлдэхүүнийг тодорхойлж дууссан бололтой. Өнөөдөр уг асуудлыг МАН-ын удирдах зөвлөлөөр хэлэлцүүлэх юм байна. Шинээр бүрдүүлэх танимд Л.Оюун-Эрдэнийн хуучин танхимаас дан дээлтэй дөрөв, давхар дээлтэй дөрвөн сайд үлдэж ажиллахаар болсон тухай хэвлэлүүд бичиж байна. Албаа үргэлжлүүлэх сайд нарын тоонд Шадар сайд С.Амарсайхан, Боловсролын сайд Л.Энх-Амгалан, Сангийн сайд Б.Жавхлан, Хууль зүй, дотоод хэргийн сайд Х.Нямбаатар, мөн Гадаад хэргийн сайд Б.Батцэцэг, Батлан хамгаалахын сайд Г.Сайханбаяр, Хөдөлмөр, нийгмийн хамгааллын сайд А.Ариунзаяа, Соёлын сайд Ч.Номин нарыг багтаажээ.

Харин шинээр давхар дээл нөмрөх сайд, гишүүдийн тоонд МАН-ын бүлгийн дарга Д.Тогтохсүрэн, УИХ-ын гишүүн Ж.Мөнхбат, Н.Учрал, Б.Чойжилсүрэн, Ч.Хүрэлбаатар, Х.Болорчулуун,  Б.Баттөмөр, Ж.Ганбаатар, Б.Саранчимэг нар багтсан тухай мэдээлэв. Үндсэндээ танхимынхаа тал хувийг шинэчилж байгаа юм байна.

Ингэхдээ, шинээр томилогдож байгаа сайд нарыг сонгохдоо төрийн хар хайрцагны бодлого, төрийн албаны мерит зарчимд /мэргэжил, ур чадварын шалгуураар шатлан дэвших тогтолцоо/ тулгуурлаж, хоёроос доошгүй удаа сонгогдсон, Байнгын хороо толгойлж байсан хүмүүсийг дэвшүүлжээ. Энэ удаагийн сэлгээгээр ажлаа өгч байгаа сайд нарын олонхи нь “Төрийн албаны туршлагагүй, залуу, салбараа мэддэггүй, салбараа мэддэг байлаа ч бодлогын түвшинд ажиллах, шийдвэр гаргах чадваргүй” гэх мэтээр шүүмжлүүлж байсныг санах ёстой.

Ерөнхийдөө үүсээд байсан нөхцөл байдал болон сонгогдсон хүмүүсийн нэрийг харвал харьцангүй “боломжийн” гэхээр сонголт. Өмнө нь хэвлэл, соошлаар сэвэгдээд, сайдын суудал горилоод байсан нөхөдтэй харьцуулбал шүү дээ. Хүнс, хөдөө аж ахуй хөнгөн үйлдвэрийн сайдад Х.Болорчулуун, Эрчим хүчний сайдад Б.Баттөмөр, Зам, тээврийн хөгжлийн сайдаар Ж.Ганбаатар нарыг нэр дэвшүүлснийг харвал бас л өөр дээрээ гал дуудах дуртай нөхөд. Гэвч аж ахуй удирдах арга барил, бизнесийн туршлага энэ тэрийг нь харсан юм болов уу даа. Х.Болорчулууны хувьд ЖДҮ зээл аваад гурилын үйлдвэр байгуулчихсан, Б.Баттөмөр нь бас л ЖДҮ-чин, Ж.Ганбаатарын хувьд бол буй биеэрээ наймаачин /бизнесмэн/ хүн. Л.Оюун-Эрдэнэд өөрт нь хангалттай гэж үзсэн бол яая гэх вэ.

Бас нэг гэнэтийн гэмээр зүйл нь Ерөнхий сайд Л.Оюун-Эрдэнэ шинээр байгуулах танхимдаа АН-аас хүн урьж байгаа. Тэргүүн Шадар сайд, Барилга хот байгуулалтын сайдын суудал амласан гэх мэдээлэл байна. Хоёр суудал гэснийг бодоход хоёр хуваагчихаад тамганы хэрүүлтэй байгаа АН-ын аль аль талтай нь эвтэй байх бодлого барьсан бололтой. Тэр нь харин байндаа тусахаараа ямар хариу урвал үзүүлэхийг таахад бэрх. С.Эрдэнэ нь лав энэ сургаар намын бүлгээ тараав бололтой. ҮХНӨ-ийг хүчингүй болгоход кноп дарсан дөрвөн гишүүнээ намаас хасах шийдвэрийг гаргасан байна.  

Ер нь бол Л.Оюун-Эрдэнийн хувьд АН-д урилга илгээх нь цаг хугацааны асуудал байсан гэж болно. МАН хоёр сонгууль дараалан төрийн эрх мэдлийг дийлэнх олонхиор азаргалсны дараа “Азийн ардчиллын баянбүрд” гэгдэж байсан Монголд коммунизмын сүүдэр сэвэлзэж эхэлсэн, нэг намын диктатрур тогтсон тухай гадна дотногүй л ярьж байгаа. Ялангуяа ОХУ-ын Украинд хийж буй дайны дараа хоёр том гүрний дунд хавчуулагдсан жижиг буурай орны ирээдүй хэрхэх бол хэмээн барууны ертөнц түгшүүртэй нүдээр харах болсон нь нууц биш. Сүүлийн хоёр сарын дотор манай улсад ойр ойрхон айлчилсан НҮБ-ын дарга болон Орос, Хятад, Япон, Солонгос, Европын холбооны гадаад хэргийн сайд нарын айлчлал ч гэсэн “Ардчиллын баян бүрд” гэгддэг Монгол улс ардчиллаа хамгаалж чадаж байна уу, үгүй юу” гэдэг дээр анхаарлаа хандуулж, сэрэмжлэх болсны бас нэг шинж.

Ийм нөхцөлд, Монгол Улсын гадаад харилцаа, геополикийн асуудлаа бодсон ч гэсэн “Монгол улс бол Орос, Хятадын талыг баримтлагч биш. Дэлхийн хөгжингүй орнуудтай хөл нийлж эдийн засгаа сэргээх бодлоготой ардчилсан улс” гэдэг үнэлэмжээ авч үлдэхийн тулд АН-ын байр суурь, дуу хоолой, дэмжлэг оролцоо зайлшгүй чухал.      

Мөн Ерөнхий сайдын зарласан “Шинэ сэргэлтийн бодлого” амжиллтай явах, цаг бусын эсэргүүцэлтэй тулахгүй байхын тулд сөрөг хүчинтэйгаа хамтарч ажиллах шаардлага байгааг ойлгож болно. Гэхдээ үүн дээр АН-ын гаргах байр суурь, шийдвэр илүү чухал. Ерөнхий сайдын энэ урилгыг ажил, хамтын ажиллагаа гэж үзэх үү? Авилга, барьцаа болгох уу? гэдэг нь намын эрх мэдэлтнүүдээс шууд хамаарна.

Б.ЗАЯА