УИХ-ын гишүүн асан Ш.Түвдэндорж өчигдөр "Х.Баттулгыг АН-ын даргаар бүртгэхгүй бол тэмцлийн хурц хэлбэрт шилжинэ" гэж сүрдүүлэв. Тодорхой хэлбэл, Х.Баттулгыг АН-ын даргаар сонгосон АН-ын нэг хэсэг гишүүний байгуулсан Улс төрийн зөвлөлийн шийдвэр ингэж гарсан юм байна. "Зулын гол болно гэх нь хаашаа юм, гэхдээ манай гишүүд гэдэс гүзээгээ угаалгаад эхэлчихсэн шүү" л гэсэн байна. Тэгээд үүнийгээ “шүүхийн шийдвэрт хөндлөнгөөс нөлөөлөх гэсэн зүйл огт биш” хэмээн тодотгожээ.

“Зулын гол болно” гэдэг нь шуудхан хэлбэл амиа хорлоно гэсэн үг. Товчхондоо, Х.Баттулга гэдэг хүн АН-ын тамгыг авахын тулд алахаас буцахгүй нь ээ. Төрийн тэргүүн, улсын эцэг, ард түмний эв нэгдлийн бэлэг тэмдэг байсан хүн ийм зүйл хийж болдог ч юм уу, үгүй ч юм уу.

Сануулахад, Ерөнхийлөгч асан Х.Баттулга гэдэг О.Цогтгэрэлийн намаас АН-ын даргад нэр дэвшиж, ганцаараа уралдан барианд орсон, АН-ын даргаар бүртгүүлэх хүсэлтээ УДШ-эд хүргүүлснээс (2022.04.13) хойш сар гаруйн хугацаа өнгөрөөд байна. Дээд шүүхийн нөхөд бүртгэлийн асуудлаар шийдвэр гаргалгүй хугацаа алдсан шалтгаанаа “Нийт гишүүдийн хурлыг зарлах ирц хүрээгүй учраас” хэмээн тайлбарласан байдаг. Тэгээд өнгөрөгч мягмар гаригт буюу тавдугаар сарын 17-нд УДШ-ийн цахим хуудсанд “20-ны өдөр нийт шүүгчдийн хуралдаан болно” гэдэг зар тавигджээ.

Гэтэл нөгөө нөхөд “Дор хаяж 10 хоногийн өмнө зараа тавих ёстой байсан, яагаад гуравхан хоногийн өмнө мэдээлэв. Шүүхэд нөлөөлөөд байна” гээд эсэргүүцээд, жагсаад эхэллээ л дээ.

Харин нөгөө тал буюу С.Эрдэнэ даргатай АН-аас өнөөдөр төрийн ордонд хэвлэлийн бага хурал зохион байгуулж, “Х.Баттулга шүүхэд нөлөөлөхийг оролдож байна. Бид шүүхийн хараат бус байдлыг хамгаална” хэмээн мэдэгдэв.

Бодит байдал дээр АН хоёр хуваагдаад жил гаруй хугацаа өнгөрч байна. Өнгөрөгч 2021 оны дөрөвдүгээр сард АН-ын хоёр фракц (С.Эрдэнэ, Ц.Туваан нар) хоёр тусдаа сонгууль явуулж, М.Тулгат, О.Цогтгэрэл нарыг намын даргаар сонгосон. Хоёулаа сонгогдсон дарга нараа Дээд шүүхэд бүртгүүлэхээр тус тусдаа хүсэлт өгсөн боловч Дээд шүүх “Нэг намаас хоёр материал хүлээж авахгүй, нэгдэж хуралдаад материалаа аваад ир” гэснээс бол жил шахуу хугацаанд АН албан ёсоор даргагүй явсан билээ.

Харин өнгөрөгч гуравдугаар сард УДШ С.Эрдэнийн намаас хүргүүлсэн намын дүрмийн шинэчлэлийг бүртгэж авснаар асуудал нэг талдаа гарсан байдаг. Үүний улмаас Х.Баттулгатай өрсөлдөхөөр намын даргын сунгаанд бүртгүүлсэн УИХ-ын гишүүн Ж.Батсуурь нэрээ татаж, Х.Баттулга ганцаараа барианд орсон.

Гэсэн хэдий ч албан ёсоор АН даргагүй хэвээр байгаа. Дээд шүүх С.Эрдэнийг бүртгэлээс хассан боловч түүний оронд сонгогдсон М.Тулгатыг бүртгэж аваагүй. Энэ нь Х.Баттулгад “онгорхой хаалга” болж харагдсан байх л даа.

Харамсалтай нь УДШ-ийн хувьд нэг намыг хоёр удаа бүртгэх боломж байхгүй. Тиймээс Х.Баттулга нар АН-ын тамгыг авахыг тулд “алахаас буцахгүй” болж байна. Яг юуны төлөө?!