Ерөнхийлөгч асан Ц.Элбэгдорж Ардчилал ба Ардчилсан Нам сэдвээр лайв хийж, олон нийтийн сүлжээнд байр сууриа илэрхийлжээ.

Энэ үеэр түүний хэлсэн нэг үгийг ишлэхгүй өнгөрч болсонгүй. Заримдаа “хэлээгүй үг хамгийн сайн үг, шийдээгүй асуудал хамгийн сайн шийдэл болдог” гэсэн тэр үг нь эрх баригч намын зүгээс түлхэж байгаа Үндсэн хуулийн өөрчлөлттэй холбоотой байв.

УИХ-ын гишүүдийн тоог нэмэгдүүлэх, Ерөнхийлөгчийг УИХ-аас томилдог сонгодог парламентын хэлбэр лүү явах, мөн сонгуулийн холимог болон пропорциональ системийг нээлттэй болгох асуудлаар өөрчлөлт хийе гэж байгаа МАН-ын бодлого нь үнэхээр шийдэх ёстой асуудал мөн үү, ярьж байгаа хүмүүс нь үүндээ хэр итгэлтэй байна вэ? Эсвэл зүгээр ярианы сэдэв болгож гаргаж тавьсан уу? гэдэг дээр Ерөнхийлөгч асан итгэлгүй байгаа бололтой.

Нэг талаас түүний зөв. Учир нь Үндсэн хуульд нэмэлт өөрчлөлт оруулаад хоёр жил хагасын л хугацаа өнгөрч байгаа. Мөн Үндсэн хуулийн нэмэлт өөрчлөлтийг МАН дангаараа эрх барьж байх үедээ баталсан, дээр нэрлэгдсэн өөрчлөлтүүд бүгд тухайн үедээ яригдаад, ажлын хэсэг дээр унаад унаад явчихсан байдаг. Өмнө 2015 онд АН эрх барьж байхдаа оруулж ирсэн Үндсэн хуулийн нэмэлт өөрчлөлтийн төсөлд ч гэсэн тусгагдсан байсан авч тухайн үеийн сөрөг хүчин болох МАН-ын эсэргүүцлээр унасан, буцаагдсан. Тэгэхээр энэ удаа ямар шаардлагаар дахин гаргаж тавьж байгааг таах аргагүй. Шаардлага байгаа нь үнэн боловч эрх барьж байгаа намын олонхи дэмжих эсэх нь бас тодорхойгүй. Нэг ийм ойлгомжгүй байдал үүсчихээд байгаа.

Хоёрдугаарт, сонгуулийн пропорциональ системийг гол болгож ярьж байгаа ч гэсэн, парламентыг чадавхжуулъя, гишүүдийн тоог нэмэгдүүлье гэж байгаа боловч хоёр дахь хувилбар болгож ярьж байгаа "хоёр танхимтай парламент"-ын асуудал нь эргэлзээ үүсгэх бас нэг шалтаг, шалтгаан болж байна. Нэг юм ярьж эхлээд эцсийн дүндээ огт өөр шийдвэр гаргах, өөр сонирхол ардаа нуусан байх нь элбэг. Энэ тал дээр МАН-д шууд итгэх боломжгүй.

Гэх мэтчилэн асуудлаас болж Үндсэн хуулийн өөрчлөлтийг өнөөдөр ярих асуудал мөн үү? гэдэг дээр Ц.Элбэгдоржийн хувьд болгоомжилж байгаа нь харагдав. Хоёрдугаарт өөрчлөхийн төлөө биш, зүгээр сэдэв гаргаж ярьж байгаа бол үүнийгээ татаарай гэдэг анхааруулгыг ч бас өгч байна лээ.  

Товчхондоо дээр хэлсэн өөрчлөлтүүдийг Үндсэн хуульд оруулах шаардлага бий юу гэвэл бий. Урьд өмнө ч байсан, оролдож үзсэн. Ганцхан үүн дээр эрх баригч нам бүх түвшиндээ бэлэн байна уу гэдэг зарчмын өөр асуудал.

Б.ЗАЯА