УИХ-ын гишүүн Т.Доржханд Тавдугаар сарын 5-ны өдрийн 12:00 цагт төв талбай дээр "Өөрсдөө өөрчил, Үгүй бол тар" тайван жагсаал зохион байгуулахаа мэдэгдлээ. 

Тэрээр мэдэгдэл хийх үеэрээ УИХ-ын зарим гишүүдийн үнэн төрхийг илчлэв. 

Өнгөрсөн баасан гаригт  УИХ-ын гишүүний халдашгүй байдлын дэд хороо, УИХ дарааллан хаалттай хуралдаж, УИХ-ын гишүүн Н.Алтанхуяг, Г.Амартүвшин, Х.Батсуурь, Ё.Баатарбилэг нарын бүрэн эрхийг түдгэлзүүлэх шаардлагагүй гэж үзсэн юм. 

Энэ талаар УИХ-ын гишүүн Т.Доржханд "Бид хулгайтайгаа зоригтой тэмцэх ёстой. Манай ангийн нөхдүүд Хөгжлийн банкны хулгайчдаа хамгаалж, түдгэлзүүлэхгүй авч үлдлээ. Энэ шударга ёс мөн үү! Хулгай хийсэн хүмүүс хуулийн хамгаалтад ороод байна. Хулгайлсан бол хулгайч гэдгийг нь хэлэх ёстой. Гэтэл УИХ-ын гишүүд нь хулгай хийснийг ярих гэтэл хаалттай хуралдаж хамгаалсан байна. Ингэх ямар хэрэг байхгүй. Нээлттэй хэлэлцэх хэрэгтэй. Нээлттэй байвал тэд хамгаалж чадахгүй. Би мэдээлэл авсан. УИХ-ын гишүүн С.Ганбаатар хулгайчдыг хамгийн их өмөөрч үг хэлсэн байна. Яагаад гэвэл, өөрөө Хөгжлийн банкны зээлтэй холбоотой юм байна. Тэр хэдэн жил шударга дүртэй явсан билээ. Бас шударга нэртэй Н.Алтанхуяг гишүүн хамгийн их сандарч тэвдсэн. Худлаа гэвэл, нэр бүхий дөрвөн гишүүнийг түдгэлзүүлэх асуудлыг ярьсан хаалттай хуралдааны протокол дээр бичигдсэн байгаа. Иргэдийнхээ өмнө нээлттэй ярь!" гэлээ.