УИХ дахь МАН-ын бүлгийн хуралдаанаар хэлэлцсэн асуудлын талаар мэдээлэл хийлээ.

Өнөөдрийн хурлаар LRT барих төслийг хэлэлцсэн байна. 

Энэ талаар Бүлгийн дарга Д.Тогтохсүрэн “Өнгөрсөн долоо хоногт Засгийн газраас төсвийн тодотголтой холбоотой хууль, тогтоолын төслүүдийг УИХ-д өргөн барьсан. Энэ дотор Төсвийн байнгын хороо болон нэгдсэн чуулганаар хэлэлцээгүй нэг тогтоол бий. Энэ бол “Шинэ сэргэлтийн бодлого”-ыг хэрэгжүүлэх хүрээнд Засгийн газраас зээлийн баталгаа гаргахтай холбоотой асуудал байсан.

Энэ тогтоолын өнөөдрийн бүлгийн хурлаас нухацтай хэлэлцлээ.

Энэ нь Улаанбаатарын түгжрэлийг бууруулахтай холбоотой асуудал учраас нийслэлийн удирдлагуудыг байлцуулан LRT төслийн талаарх танилцуулгыг сонслоо. Ингээд бүлгээс LRT төслийн дахин хэлэлцэх шаардлагатай гэж үзлээ. Энэ нь төсвийн тодотголыг дагалдуулан яаран шийдэх асуудал биш учраас тэр.

“Шинэ сэргэлтийн бодлого”-ыг хэрэгжүүлэх хүрээнд Засгийн газраас зээлийн баталгаа гаргахтай холбоотой тогтоолын төсөлд хөнгөн галт тэрэг буюу LRT төсөл, Тавантолгойн дулааны цахилгаан станцын асуудал байгаа. Энэ хоёр том төсөл дээр бүлгээс ажлын хэсэг гарган Засгийн газартай хамтран ажиллая гэж тогтлоо” гэсэн юм. 

Мөн тэрээр "Нийслэлийн түгжрэлийг шийдэх шаардлагатай гэдэг дээр гишүүд 100 хувь санал нэгдэж байгаа. Энд төсөв танасан асуудал ямар ч хамаагүй. Харин төсөвт өртөг, үйлчилгээний үнэ тариф, цаашдын хөгжлийн асуудалтай холбоотой олон зүйл бий. Энд зөвхөн нэгдүгээр ээлжийнх нь төсөл яригдаж байгаа. Нийтдээ гурван ээлжийн төсөлтэй, 49 км урт замтай холбоотой асуудал учраас дахин сайтар ярилцах шаардлагатай гэж үзсэн. Түүнээс биш хот, хөдөөгөөрөө ялгараад, орон нутгаас сонгогдсон гишүүд "бидний хөрөнгө оруулалтыг хассан" гэдэг байдлаар хандсан зүйл огтхон ч байхгүй гэдгийг хэлье" гэлээ.