Өнгөрсөн долоо хоногт ОХУ-ын Холбооны Зөвлөлийн (парламентын дээд танхим) төлөөлөгч Константин Косачев хэвлэлд Америкчууд Украин дахь биолабораториудаа Монгол улсын нутаг дэвсгэрт шилжүүлэхээр төлөвлөж байгаа тухай ярьсан билээ.
Тэгвэл УИХ дахь Ардчилсан намын бүлгээс өнөөдөр мэдээлэл хийх үеэр Бүлгийн дарга Д.Ганбат өөрийн байр сууриа илэрхийллээ.
Тэрээр "Украин, ОХУ-ын хоорондын нөхцөл байдал үүссэнээс хойш Монголд Био лаборатори бий болгосон бөгөөд ажиллаж байгаа гэсэн мэдээллийг ОХУ-ын албаны хүн удаа дараа хэлж байна. Энэ талаар ГХЯ өчигдөр мэдэгдэл гаргасан. Хөндлөнгийн экспертүүдийг яаралтай уриад ийм лаборатори байна уу үгүй юу гэдэг дүгнэлтийг гаргуулж, найрсаг хөрш ОХУ-ын зохих байгууллагуудад хүргүүлэх хэрэгтэй. Өөрөөр хэлбэл, мэдэгдлээс илүү зүйл хийх нь зөв. Жуковын хөшөөний дэргэд самбартай жагссан иргэдийн мэдээллийг нягтлах шаардлагатай" гэсэн юм.
Энэ талаар Гадаад харилцааны яамнаас ОХУ-ын зарим өндөр албан тушаалтан бодит байдалд нийцэхгүй, ор үндэслэлгүй мэдээлэл хийж байна хэмээн албан ёсны мэдэгдэл гаргасан юм.
