Засгийн газар ээлжит бус хуралдаан 10:00 цагт эхэллээ. Өнөөдрийн хуралдаанаар үүсээд буй нөхцөл байдалтай холбогдуулан төсөвт тодотгол хийх асуудлыг хэлэлцэх юм.

УИХ дахь МАН-ын бүлэг энэ оны төсөвт тодотгол хийх шийдвэр гаргасан гэдгийг УИХ-ын гишүүн, Төсвийн байнгын хорооны дарга Ч.Хүрэлбаатар мэдээлсэн билээ.

Тэрээр "2022 оны Монгол Улсын эдийн засагт тулгамдаад байгаа гол асуудал бол үнийн өсөлт. Өнгөрсөн онд төсвийг хэлэлцэж байхад олон гишүүд асуудлыг хөндөж ярьж байсан. Урьд хөршид ковидын халдвар гарсны улмаас нөхцөл байдал сайжрахгүй гэсэн төлөв харагдаж байна. Үүнээс гадна Украйнд болж байгаа дайнтай холбоотой хойд хөршид ч нөхцөл байдал амаргүй байна. Үүнтэй холбоотой эдийн засагт хүндрэл бэрхшээл гарсаар байгаа юм. Энэ онд эдийн засгийн нөхцөл сайжирна гэсэн хүлээлт байсан нь өөрчлөгдөж байна.

Тиймээс ам.долларын ханш, төгрөгийн ханшид ирж буй үнийн дарамтыг бууруулах хэрэгтэй. Их хэмжээний вальютын эрэлтийг бий болгох нь олон эрсдлийг үүсгэж байна. Нэгдүгээрт, төгрөгийн ханшийг унагаж, вальютын нөөц хомсдоход хүргэж байна.

Мөн хүндрэлтэй байгаа тээвэр ложистикт улам хүнд дарамт үүсгэж, үүнийг дагасан үнийн өсөлтийг бий болгох эрдсэлтэй болж байгаа юм. Тиймээс богино хугацаанд үр дүн гаргахын тулд Төсвийн тодотголыг хийхийг бүлгийн гишүүдийн 100 хувийн саналаар дэмжлээ" гэсэн юм.