Засгийн газар өчигдөр ээлжит бусаар хуралдсаж, хуралдаанаар Төв талбайд жагсаж байгаа залуусын тавьсан 15 үндэслэл бүхий шаардлагыг авч хэлэлцсэн юм. 

Хуралдааны дараа Ерөнхий сайд Л.Оюун-Эрдэнэ төв талбай дээр мэдээлэл хийсэн билээ .

Тэрээр "Жагсаалд оролцогчдын зүгээс тавьсан Засгийн газарт хүргүүлсэн 15 шаардлагыг хэлэлцлээ.

• Нэгт, үнийн өсөлттэй холбоотой хуулийг боловсруулж, УИХ-д хүргүүлсэн. Сая УИХ-ын даргатай утсаар холбогдлоо. Энэ хуулийг УИХ энэ сарын 15-ны өдрийн дотор хэлэлцэн батлахаар боллоо.

• Хоёрт, ЦЕГ-ын дарга, ТЕГ-ын удирдлагууд хуралдаанд оролцлоо. Саатуулагдсан иргэдийг бүрэн сулласан гэж мэдээллээ. Мөн дахин ямар нэгэн асуудал үүсгэхгүй гэдгийг хэллээ.

• Гуравт, авлига албан тушаалд холбогдсон этгээдийг ял наймаалцсан хэлбэрээр шийдэхгүй байх хуулийн төслийг яаралтай байдлаар өргөн барихаар тогтлоо. Албан тушаалтнуудыг ялгаварлахгүйгээр шалгахаар боллоо. Хөгжлийн банк зэрэгтэй холбоотой асуудлыг олон нийтийн зүгээс шахаж байгаа гэдгийг холбогдох хуулийн байгууллагад мэдэгдлээ.

• Дөрөвт, Засгийн газар хэмнэлтийн горимд шилжсэн тогтоолыг сэргээлээ. Төрийн албан тушаалтнуудын тасалгаанд ам.метрийн шалгуур тавих зэрэг хэмнэлийн горимд шилжихээр боллоо.

Мөн Төрийн өмчит газруудыг олон нийтийн хяналталд оруулахаар болж, асуудлыг ирэх долоо хоногт Засгийн газрын хуралдаанаар оруулахаар боллоо. Залуучуудын холбооны байрны асуудлыг шамшигдуулсан зэрэг асуудлыг шалгаж, АТГ-т шилжүүлж шалгуулахаар боллоо.

Нийт 15 шаардлагын 11-ийг нь Засгийн газар бие дааж шийдэх эрхтэй байна" гэв. 

Мөн тэрээр " Цаашлаад бусад асуудлыг нь УИХ-тай хамтарч ярилцах асуудал байна. Нийгмийн даатгалын шимтгэл, НӨАТ, олон улсын төлбөр тооцоо, сонгуулийн хар машин, Улсын Их Хурлын гишүүний халдашгүй бүрэн эрхтэй холбоотой асуудлыг Засгийн газар дангаар шийдвэрлэх боломжгүй тул ирэх долоо хоногт Улсын Их Хурлын удирдлага, холбогдох Байнгын хороонд Засгийн газраас хүргүүлж, хариу өгнө.

Эдгээр шүүмжлэл дагуулсан асуудалд бухимдалтай байгааг холбогдох Байнгын хороодын дарга нар, УИХ-ын удирдлагуудад илэрхийлсэн байгаа. Үүнийг УИХ-тай хамтарч шийдэх тал дээр ажиллана" гэлээ.