Төрийн ордны Их танхимд өнөөдөр нэгэн томоохон арга хэмжээ болов. УИХ-ын үндсэн үүрэг болох хууль тогтоох үйл үйл ажиллагаанд иргэд, олон нийтийн оролцоог хангахад чиглэсэн “D-Parliament” цахим системийн нээлтийг олон нийтийн оролцоотойгоор хийлээ.
Төрийн ордонд болсон нээлтийн ажиллагаанд УИХ, Засгийн газрын гишүүд, төрийн болон төрийн бус байгууллага, иргэд, хэвлэл мэдээлэл, олон улсын байгууллагын төлөөлөл оролцсоноос гадна орон нутгаас иргэд цахимаар оролцож, вэб, аппликейшн хосолсон цахим системийг УИХ-ын дарга Г.Занданшатар өөрийн биеэр танилцуулав. Тэр энэ үеэр "Нийгмийн сүлжээний давалгаагаар нийтийн эрх ашгийг хохироосон шийдвэрийг төр гаргаж болохгүй" гэсэн нь шинэ системийн гол зарчим, мөн давуу тал юм. Өөрөөр хэлбэл, "D-Parliament" аппликейшныг ашиглахдаа иргэд зөвхөн өөрийн албан ёсны бүртгэлтэй хаягаар оролцох тул "тролл" буюу хуурамч хаягаар хуурамч мэдээлэл илгээх боломжгүй юм.
Монгол Улсын Үндсэн хуулийн гуравдугаар зүйлд “Монгол Улсын засгийн бүх эрх мэдэл ард түмний мэдэлд байна. Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдэлнэ” гэсэн нь төрийн үйл хэрэгт иргэдийн оролцоог хангах эрх зүйн үндсийг тавьсан байдаг.
Харин шинээр нээлтээ хийсэн "D-Parliament" аппликейшн нь иргэд хууль тогтоох ажиллагаанд шууд оролцох боломжийг олгож байгаа юм байна. Тодруулбал, системд байрлуулсан өргөн барьсан болон хэлэлцүүлгийн шатанд яваа хуулийн төслийн зүйл заалт тус бүрт иргэд санал өгөх (дэмжих, эсэргүүцэх, сэтгэгдэл буюу саналаа бичих) боломжийг техникийн хувьд бүрдүүлсэн байна. Монгол Улсын нийт иргэдийн 84,7 хувь цахим төхөөрөмж буюу ухаалаг гар утас ашиглаж байгаа өнөөдрийн нөхцөлд хууль тогтоох үйл ажиллагаанд иргэд болон, иргэний нийгмийн байгууллагуудын оролцоо, идэвхийг нэмэгдүүлэх, төрийн бодлого шийдвэрт иргэд, олон нийтийн оролцоог бодитой болгоход “D-Parliament” цахим системийн ач холбогдол оршиж байгаа юм.
Манай улс 1990 онд байнгын ажиллагаатай парламенттай болсноос хойш өнгөрсөн 30 жилд парламентын үйл ажиллагаа иргэдэд нээлттэй байсаар ирсэн ч хуулийн төсөл боловсруулах, хэлэлцэх, батлах үйл явцад иргэд шууд оролцох боломжгүй байсан билээ. (Монгол Улсын 3,3 сая хүнийг төлөөлөн 76 гишүүн УИХ-д хууль тогтоодог. Нэг гишүүнд дунджаар 43.4 мянган хүнийг төлөөлдөг)
Судалгаанаас харахад Монгол Улсын нийт өрхийн 80 орчим хувь нь интернетэд холбогдож, хэрэглэгчдийн тоо нь 2,6 саяд хүрчээ. Нэгэнт ийм суурь бүтэц бүрдсэн тул иргэдийн оролцоотой хууль тогтоодог, нээлттэй, ил тод, сонгогчидтойгоо амьд холбоотой цахим парламент болж өөрчлөгдөх цаг болсныг УИХ-ын дарга Г.Занданшатар энэ өдөр онцлон тэмдэглэлээ.
