Төрийн ордонд болсон /2022.03.29/ Хөгжлийн банкны асуудлаарх нээлттэй сонсголын үеэр УИХ-ын гишүүн Х.Булгантуяа нэгэн “ноцтой” мэдэгдлийг хийв.

Тодруулбал, Хөгжлийн банк өнгөрсөн хугацаанд төрийн өмчит компаниудын урсгал зардлын санхүүжүүлж ирсэн байна. Тухайлбал,

-Эгийн голын усан цахилгаан станц 1.4 тэрбум,

-Тавантолгойн цахилгаан станцад 3 сая ам.доллар,

-Шинэ төмөр замын хуулийн зөвлөх үйлчилгээнд 3.2 сая ам.доллар,

-Техникийн зөвлөх үйлчилгээнд 3 сая ам.доллар,

-Санхүүгийн зөвлөх үйлчилгээнд 1.6 сая ам.доллар,

-Хаан банкны зээл хүүгийн төлбөрт 6.5 сая ам.доллар зарцуулсан байна. Гэвч энэ үйлдлийг ямар хууль, журмаар зохицуулсан нь тодорхойгүй.

Тэгсэн хэрнээ зориулалтын дагуу зээл авсан компаниудыг чанаргүй зээлдэгч ангилалд оруулсан. Ковид гарах хүртэл зээлээ хэвийн төлөөд явж байсан компаниудад дахин зээл төлөх хуваарь гаргаж өгч болохгүй юу? Та нар цементийн үйлдвэр ажиллуулах юм уу? гэдэг асуултыг Хөгжлийн банкны удирдлагаас асуув.

Мөн Хөгжлийн банкны нийт зээлийг 1/3-ийг төрийн өмчит компаниуд авсан. Гэтэл уг зээлийг улсын төсөвт шилжүүлнэ гэж ярьж байгааг буруутгаж, төрийн өмчит компаниудын авсан зээлийг татвар төлөгчдийн мөнгөөр төлж болохгүй гэв. Түүний асуултад Хөгжлийн банкны гүйцэтгэх захирал Н.Мандуул хариулахдаа,

-“Бид одоо байгаа чанаргүй 1.8 их наядын зээлээ шинж чанараар нь ангилсан. 1/3 нь төрийн өмчит компаниудын зарцуулсан төсвийн шинж чанартай зардал байгаа. Бид зөвхөн шийдлийн хувилбарыг хайж байна. Зээлийг Засгийн газарт шилжүүлэх эсэхийг УИХ-ын шийднэ.

Төрийн өмчийн компаниудын зардлаас гадна Хөтөл болон QSC компаниудын 500 орчим тэрбум төгрөгийн зээл байгаа. Эдгээрийн нөгөө талд нэг их наяд орчим төгрөгийн хувийн хэвшлүүдийн чанаргүй зээл байна. Шүүхэд нэхэмжлэл гаргасан 30 гаруй зээлдэгчийн асуудал байгаа.  Бид нөхцөлөө муутгахгүйгээр яаж зээлээ төлүүлэх вэ гэдэгт анхаарч байна.

Нөгөө талд активын удирдлагын компани байгуулах асуудлыг боловсруулаад Сангийн яаманд хувилбараа санал болгосон. Бид чадах ядахаараа хувилбар санал болгож байгаа. Эцсийн шийдвэрийг Засгийн газар, УИХ гаргана” гэсэн байна.