УДШ-ийн Ерөнхий шүүгч Д.Ганзоригийн Үндсэн хууль зөрчсөн эсэх асуудлыг Үндсэн хуулийн цэц Их суудлын хуралдаанаараа хаалттай хэлэлцэж байна.

Д.Ганзориг нь 1998 онд МУИС-ийн Хууль зүйн дээд сургуулийг эрх зүйч мэргэжлээр төгссөн. 1999-2004 онд Сонгинохайрхан дүүргийн шүүхийн шүүх хуралдааны нарийн бичгийн дарга, 2004-2013 онд Сонгинохайрхан дүүргийн шүүхийн шүүгчээр ажиллаж байгаад 2013 онд Улсын дээд шүүхийн шүүгчээр томилогдсон. 2020 оны зургадугаар сараас УДШ-ийн Ерөнхий шүүгчээр томилогдон ажиллаж байгаа.

Түүнд, УДШ-ийн Захиргааны хэргийн шүүх хуралдааны 2019 оны нэгэн тогтоолоор Ерөнхий шүүгчид гаргасан гомдолд Ерөнхий шүүгч ажлын албаараа дамжуулан хариу өгсөн нь Үндсэн хууль зөрчсөн тухай иргэн Т-гийн гаргасан гомдлоор Цэц маргаан үүсгээд байгаа юм.

Маргааныг хэлэлцэх Цэцийн Их суудлын хуралдаан өнөөдөр өглөө /2022.03.28/ 09.30 цагт хаалттай эхэлсэн байна. Цэцийн хуралдаанд Ерөнхий шүүгчийн итгэмжлэгдсэн төлөөлөгчөөр УДШ-ийн шүүгч Д.Мөнхтуяа, иргэн "Т"-гийн өмгөөлөгчөөр н.Монгол оролцож байгаа юм байна. Хуралдаан эхлэхийн өмнө талууд хуралдааныг нээлттэй явуулах хүсэлт гаргасан боловч хуралдаан даргалагч тэдний саналыг хүлээж авалгүй, цэцийн хуралдааныг хаалттай эхлүүлжээ.