Олны хэлдгээр “дрондоо чирэгдэж” ажлаа өгсөн Н.Уртнасан сайдын албыг аваад байгаа БОАЖ-ын сайд Б.Бат-Эрдэнэ тамгаа авсныхаа маргааш /өчигдөр/ шууд “Тавантолгой Түлш” компанийн зүүн бүсийн үйлдвэрт ажиллажээ. Тэрээр үйлдвэрлэлийн үйл ажиллагаатай “газар дээр нь” танилцаж, зарим нэг үүрэг чиглэлүүдийг өгчээ. Тухайлбал, түлшний асалтыг дэмжих бүтээгдэхүүн үйлдвэрлэх, үйлдвэрлэлийн ойр орчмын бохирдлыг арилгахын тулд ногоон бүс, цэцэрлэгт хүрээлэн байгуулах, мөн саяхан гал гарсан баруун бусийн үйлдвэрийг нүүлгэж, шинээр барих гэх мэтчилэн 5-6 үүрэг чиглэл өгсөн байна.

Товчхондоо шинэ сайдын шийдэх ёстой олон асуудлын нэгдүгээрт “түлшний” асуудал эрэмбэлэгдсэнгүй. Түүнээс өмнө түлшний чанар, стандартад хяналт тавьж ажилласан мэргэжлийн хүмүүс “2019 онд баталсан MNS5679 стандартыг шинэчлэх, үйлдвэрлэлийн технологийг сайжруулах зайлшгүй шаардлага байна. Түлшний стандартыг нэг шат ахиулахаар бол түүнд ашиглаж байгаа түүхий эд болон зуухны стандартыг сайжруулах шаардлагатай” гэсэн боловч сайдын өгсөн үүрэг даалгаар энэ хүрээнээс хальсан л байдаг юм.

Үйлдвэрийн орчны бохирдлыг арилгах, ногоон байгууламж барих гэх мэт нь тус яамны хийх ёстой ажил мөн боловч яг өнөөдрийн нөхцөлд Улаанбаатарын утааг бууруулахад шууд нөлөөлөх хүчин зүйл мөн үү? Түүнээсээ өмнө түлшний чанарын тухай эхлээд ярих ёстой биш үү. Ер нь тэгээд түлшний үйлдвэрлэлийг хариуцаж байгаа Эрчим хүчний сайд нь яагаад дуугардаггүй юм? Ерөөсөө Н.Уртнасан сайдыг огцруулсан нь утаагүй түлштэй холбоотой байсан уу? гэх мэт олон асуудал урган гарна.

Мөн түүнээс илүү сонирхолтой асуулт бол дэлхийд 50-60 жилийн өмнө бий болоод одоо хүртэл ашиглагдаж байгаа /хамгийн ойрын жишээ манай өмнөд хөрш/ утаагүй түлшийг яагаад монголчууд цоо шинээр бүтээх гээд, бүтэлгүйтээд яваа юм. Технологийг нь тэр хэвээр нь оруулж ирээд түүхий эдээ гаргаад үйлдвэрлэх боломж манайд байсан уу?  

Явж явж утаагүй түлшийг бий болгосон ганц шалтгаан нь Ерөнхий сайд У.Хүрэлсүхийг Ерөнхийлөгчид нэр дэвшихэд зориулсан богино хугацааны тренд, завсрын ажиллагаа л байсан юм биш үү? Тийм биш бол яагаад хоёрхон жилийн өмнө баталсан стандартаа "хоцрогдлоо, сайжруулъя" гэж ярих болов? Түлшний шаталтыг сайжруулахын оронд шаталтыг дэмжих нэмэлт бүтээгдэхүүн үйлдвэрлэх тухай ярих нь шийдвэрлэх арга зам мөн үү?!