Олимпийн марафон дурдуур ҮАБЗ-ийн ажилтан гэгдэж асан өмгөөлөгч Б.Баасанцогт бас "марафон"-ыг эхлүүллээ. Тодруулбал, Ерөнхий сайд асан М.Энхсайханы хэрэг дээр яллагчаар ажилласан прокурортой уулзаж байсан Б.Баасанцогт Zarig.mn сайтын сэтгүүлчид гардуулж, хөлийн хурдаар зугтсан бичлэг өөрөө сүүлд болсон сонгууль, корона, түүний улмаас цуцлагдсан наадам зэргээс болж олны анхаарлаас түр хугацаанд алсраад байсан шүүгч нарын хэргийг дахин сануулав.

Ерөнхийлөгчийн сонгууль зарлагдахын өмнө өмгөөлөгч Б.Баасанцогт нэр бүхий шүүгч, прокурор, АТГ-ын ажилтнуудын хамтанд лифтэнд байгаа анхны бичлэг олон нийтэд цацагдаж, “хонгилын” гэж нэрлэгдсэн тэдгээр хуулийнхний нэр усыг нийтэд зарласан билээ. Үүний араас өмгөөлөгч Б.Баасанцогт нь НПГ-ын ерөнхий прокурор Ш.Нямдорж, Эрүүгийн цагдаагийн албаны Эдийн засгийн гамт хэрэгтэй тэмцэх хэлтсийн дарга Б.Оргил, Зохион байгуулалттай гэмт хэрэгтэй тэмцэх хэтсийн ажилтнууд, Хан-Уул дүүргийн цагдаагийн 1-р хэлтсийн эрүүгийн мөрдөгч С.Гүндноров, ТЕГ-ын ажилтан Н.Агваан, АТГ-ын олон нийтийн зөвлөлийн дарга Г.Баасан зэрэг хууль, хүчний байгууллагын албан хаагчдын дансанд мөнгө шилжүүлдэг байсан тухай мэдээллийн мөрөөр хуулийн байгууллага шалгалт хийж эхэлсэн билээ.

Баталгаатай зүйл гэвэл Б.Баасанцогтын данснаас нэр бүхий 11 шүүгчид 2017 оны долдугаар сараас 2011 оны нэгдүгээр сар хүртэлх хугацаанд нийтдээ 47 сая төгрөг шилжүүлсэн баримт хэвлэлээр дэлгэгдсэн. Энэ 11 шүүгчийн зургаа нь М.Энхсайханы хэргийг шүүхээр шийдвэрлэхэд оролцсон тухай эх сурвалжууд хэлж байна. Санамсаргүй тохиолдол гэхэд итгэмээргүй давхцал биз?

Б.Баасанцогтын данснаас:

-Баянгол, Хан-Уул дүүргийн Иргэний  хэргийн анхан шатны шүүхийн шүүгч Бүүвэйбаатарын Мөнхбаярын 507603....дансанд 2019.8.30-нд 5.0 сая, 2020.4.7-5.0 сая, нийт  10 сая төгрөг,

-Нийслэл дэх Захиргааны хэргийн анхан шатны шүүхийн шүүгч Цогийн Одмаагийн 502973.... тоот дансанд 2017.9.19-нд 60 мянган төгрөг

-Баянгол, Хан-Уул дүүргийн Иргэний  хэргийн анхан шатны шүүхийн шүүгч Дэмчигийн Энхцэцэгийн 503417.... тоот дансанд 2020.8.5-нд 1.3 сая, 2020.11.14-нд 5.0 сая, нийт 6.3 сая төгрөг

-Баянгол, Хан-Уул дүүргийн Иргэний  хэргийн анхан шатны шүүхийн шүүгч Жамсранжавын Эрдэнэчимэгийн 503435.... дансанд 2019.2.14-нд 500 мянган төгрөг

-Сүхбаатар дүүргийн Эрүүгийн хэргийн анхан шатны шүүхийн шүүгч Загдаагийн Болдбаатарын 524712.... дансанд 2017.11.13-нд 1.0 сая, 2019.12.26-нд 300 мянга, нийт 1.3 сая төгрөг

-Баянгол, Хан-Уул дүүргийн Иргэний  хэргийн анхан шатны шүүхийн ажилтан Ганбаатарын Зулаагийн 542926.... 2021.1.27- 550 мянга

-Баянгол, Хан-Уул дүүргийн Иргэний  хэргийн анхан шатны шүүхэд ажиллаж байсан Золзаяагийн Ууганзаяагийн 503420....дансанд 2019.12.29-нд 1.5 сая, 2020.5.6-нд 460 мянга, 2020.7.6-нд 700 мянга, нийт 2 660 000 төгрөг

-Улсын Дээд шүүхэд ажиллаж байсан Төмөрхуягийн Батдоржийн 575333.... дансанд 2019.2.1-нд 500 мянга, 2019.8.2-нд 150 мянга, 2019.9.11-нд 200 мянга, 2019.9.12-нд 400 мянга, 2019.12.13-нд 2.5 сая, 2020.5.6-нд 15 сая, 2020.8.29-нд 5.0 сая, 2020.11.3-нд 500 мянга, нийт 24 250 000 төгрөг

-Баянгол, Хан-Уул дүүргийн Иргэний  хэргийн анхан шатны шүүхийн ажилтан Энхбатын Дарханцэцэгийн 572125.... дансанд 2019.7.8- нд 500 мянга төгрөг

-Улсын Дээд шүүхийн ажилтан Наранцогтын Мөнхтулгын  501920.... дансанд  2020.6.9-нд 800 мянган төгрөг

-Сүхбаатар, Чингэлтэй дүүргийн Эрүүгийн хэргийн анхан шатны шүүхийн ажилтан Гэрэлээгийн Галдандагвын 501819....дансанд 2019.9.27-нд 300 мянган төгрөг тус тус шилжүүлжээ.

Эхний бичлэг цацагдах үед Б.Баасанцогт нь ҮАБЗ-ийн ажлын албанд гэрээгээр ажил гүйцэтгэж байсан. Мөн Төрийн ордны цайны өрөөнд нэр бүхий шүүгч, прокуроруудыг уулздаг байсан, мөн Б.Баасанцогтоос өөрөөс нь өнгөрсөн хоёр жилийн хугацаанд шүүхээр шийдэгдсэн албан тушаалтнуудыг хэдийд хэрхэн шүүхээр оруулах тухай графикчилсан төлөвлөгөө хүртэл олдсон байдаг. Тухайн үед энэ хэрэг нэлээд өндөр авч, хуулийнхан ажиллаж эхэлсэн боловч тавдугаар сард Ерөнхийлөгчийн ээлжит сонгууль зарлагдсанаас хойш нам жим болж, олны анхаарлаас холдсон.

Хуульзүйн сайд асан Х.Тэмүүжин энэ хэргийн тухайд "Х.Баттулга, У.Хүрэлсүх хоёр хэн нь нэр дэвших вэ гэдгээ шодож, “цаасан буу” буудаж үзсэн л хэрэг. Харилцан тохиролцох, нэг нь бууж, нөгөө нь дэвших л зорилготой байсан болов уу” хэмээн дүгнэсэн байдаг. Түүний хэлсэнчлэн сонгууль өнгөрсний дараа Б.Баасанцогтын хэрэг олны анхаарлаас холдож, “хонгилын” гэх шүүгч нарын нэр ч мөн дурсагдахаа больсон билээ. Гэвч муу юмыг даравч далдайж, булавч бултайдаг жамтай. Б.Баасанцогт анхаарал алдаж, сэтгүүлчийн дуранд өртсөнөөр шүүгч нарын хэрэг ч дахин босч ирэв. Тэр дундаа чухам яагаад М.Энхсайханыг ялласан прокурортой олноос нуугдаж уулзсан нь анхаарал татаж байна.

Тавантолгой төслийн удирдагчаар ажиллаж байсан М.Энхсайханыг гэмт хэрэгтэн болгосон хүн нь яалт ч үгүй Ерөнхийлөгч асан Х.Баттулга. Тэр Ерөнхийлөгчийн албан тушаалд томилогдсоныхоо дараа УЕП-ын өрөөнд 100 гаруй хуудас материалтай явж ороод “Иргэн хүнийхээ хувьд мэдээлэл гаргаж байна. М.Энхсайханыг шалга” хэмээн Ерөнхийлөгчийн хувиар үүрэг өгсөн билээ. Энэ дагуу нь прокурорын байгууллага М.Энхсайханд “Үндэсний эрх ашгийг хорлон сүйтгэсэн” зүйл ангиар хэрэг үүсгэж, ял төлөвлөсөн ч тэр нь нотлогдоогүйн улмаас албан хэрэгцээндээ унаж байсан машиных нь үнээр хохирол тооцон ялласан байдаг. Гэтэл энэ хэрэг дээр ажилласан зургаан шүүгч Б.Баасанцогттой холбоотой. Сонирхолтой биз?

Б.ЗАЯА