Хотын дарга Д.Сумъяабазар өнөөдөр Туул голын эрэг дагуу олгосон газрын зөвшөөрлийг цуцлахаа мэдэгдэж, газар дээр нь очиж ажиллаа. 

Энэ үеэр Нийслэлийн газар зохион байгуулалтын албаны дарга А.Энхманлай "Туул голын хойд эрэг дагуу 2008 оноос хойш 22 ААН-д газар олгосон байдаг. Үүнээс 19 нь одоогоор барилга бариагүй байна. Туул голын эрэг дагуу газар эзэмшдэг 17 компанид газар эзэмших зөвшөөрлийг цуцлах мэдэгдлийг Дөрөвдүгээр сарын 15, 29-ний өдөр хоёр удаа өгсөн. Одоо дахин мэдэгдэл өгч, зөвшөөрлийг цуцлаад, бургас тайрч шороогоор булсан хэсгийг унаган төрхөөр нь нөхөн сэргээх шаардлагатай" гэсэн юм.

Харин Хотын дарга Д.Сумъяабазар "Туул голын эргийн бургасыг хядаж, дээр нь шороо асгаж газраа тэгшлэн орон сууц барих ажил явагдаж байна. Энэ ажлыг оройн цагаар, нууцаар хийгээд байна. Туул голын усны түвшинг барьдаг гол зүйл нь бургас шүү дээ.

Голын эрэг дагуу орон сууц барих нь газар хөдлөлтийн эрсдэлтэй. Улаанбаатар хотын хамгийн үнэ цэнэтэй газар хойгуураа Чингэлтэй хайрханы өврөөр байгаа. Хадтай, чулуутай, газар хөдлөлтийн зурвасаас хол шүү дээ. Хот хойноосоо сайхан харагддаг.

Улаанбаатар хотод нэмж 0.7 газар дахин олгохгүй. 0.7 га газар олгоод байвал гэр хорооллын тэлэлт, түүнийг дагасан дэд бүтцийн дарамтын зардал тоймоо алдаж байна. Улаанбаатар хотод газар олголтыг энэ цагаас эхлэн зогсоох хэрэгтэй. Иргэн бүхэн өмчлөх эрхтэй газартай байгаа, тэр мэдээллийг ил тод болгох хэрэгтэй байна. Иргэдийн эзэмшиж, өмчилж байгаа газрын үнэ цэнийг өсгөхийн тулд хотод дахин газар олгож болохгүй.

Мөн хоёр жилийн хугацаанд газар аваад, тэр хугацаандаа ашиглаагүй бол зөвшөөрлийг цуцлах ёстой" гэлээ.