Өчигдөр буюу 14-ний өдөр 70 настай эмэгтэй тусгаарлах байранд нас баржээ. Төв аймагт ганцаараа амьдардаг уг иргэнийг батлагдсан тохиолдлын ойрын хавьтал хэмээн гуравдугаар сарын 11-нд Mongolica зочид буудалд тусгаарласан байна.

12-ны өдрийн PCR шинжилгээгээр сөрөг гарсан боловч өчигдөр гэнэт нас барсан байна.

Тусгаарлах байранд ирэх үед нь түүнийг СЭМҮТ-өөс эмч очиж үзсэн, эмчийн үзлэгээр "хөнгөн хэлбэрийн ой тогтоолт алдагдалтай, хөнгөн хэлбэрийн сэтгэцийн өөрчлөлттэй" гэсэн дүгнэлт гарсан бөгөөд тусгаарлах байрны журмын дагуу эмч өдөрт 4-5 удаа үзлэг хийж байсан. Өчигдөр гэнэт нас барсан. Урьдчилсан дүгнэлтээр суурь өвчний шалтгаантай байх магадлалтай. Хэрэв ар гэрийнхэн нь хүсэлт гаргавал задлан шинжилгээ хийж оношийг нь эцэслэх тухай Эрүүл мэндийн сайд С.Энхболд мэдээлсэн байна.

Эрүүл мэндийн сайд цаг үеийн байдлын талаарх сэтгүүлчдийн асуултад доорх хариултыг өгсөн байна.

-AstraZeneca вакцин дууссан гэсэн мэдээлэл байна?

- AstraZeneca вакциныг 65-аас дээш насныханд хийж болохгүй гэдэг зөвлөмж байгаа. ДЭМБ-аас энэ вакциныг гурван оронд түр зогсоосон. Цусны бүлэн үүсэн тохиолдлын шалтгааныг судалж байгаа. Түүнээс биш AstraZeneca вакциныг бүрэн хориогүй. Манай улс AstraZeneca вакциныг үргэлжлүүлэн хийж байгаа.

-Иргэд вакцинаа сонгож хийлгэх үү?

-Манай улс дөрвөн вакциныг зөвшөөрсөн. Хүний эмийн зөвлөлөөс AstraZeneca, Спутник, Синофарм, Pfizer энэ дөрвөн вакцинд зөвшөөрөл өгсөн. Иргэдийн хувьд вакцин хийлгэхээс өмнө эмч үзээд харшил, даралт зэргээс шалтгаалан эмнэлгийн заалтаар  сонгож хийнэ. Иргэдээр өөрсдөөр нь сонгуулна гэсэн үг биш. Зөвхөн эмнэлгийн заалтаар хийж байгаа. 

Жишээ нь, Спутник, Синофармыг харшил, урвал бага өгдөг учраас 65-аас дээш насныханд хийж болно гэсэн эмнэлгийн заалт бий.