Улсын онцгой комисс хуралдаж, монгол улсад тогтоогоод буй хөл хорионы үед хэрхэн ажиллах талаар мэдээллээ. 

Олон нийтийн хөл хөдөлгөөн, цагдаагийн байгууллагаас явуулж буй арга хэмжээний талаар ЦЕГ-ын дэд дарга, хурандаа Ж.Амгалан мэдээлэл өгөв.  

Тэрээр "Дэлхийн аль ч улс оронд халдвар өвчин гарсан бол богино хугацаанд, эрсдэл багатай даван туулахын тулд иргэн бүр дэглэмээ хатуу сахидаг, сонор сэрэмжтэй, тэвчээрэй байж даван туулдаг нь нотлогдсон. Монгол улс коронавирус алдагдсан тохиолдолд авах арга тактик, төлөвлөгөө байгаа. 

Манай иргэд коронавирус анх гарах үед тэвчээртэй сайн ажилласан, одоо илүү сайн ажиллах шаардлагатай байна. Өнөөдрийн янзаар бол явган болон, автомашинтай иргэдийн хөдөлгөөн их байна. Дэглэм сахиулахад сайнгүй байна гэсэн үг. Эрсдэл их байна. Ийм учраас өнөөдөр 23:00 цагаас автомашин болон явганаар зорчихыг багасгах талаар шаардлага тавьж эхэлнэ. 

Гадуур явж байгаа иргэдийн дунд судалгаа хийлээ. Ихэвчлэн нэгнийдээ очих, хүнтэй уулзах болон зорилгогүй явдаг юм байна. Одоо цар тахал гарсан тул иргэд гэрийн дэглэмээ сахиж, хяналт тавиж буй албаныханы шаардлагыг биелүүлээрэй гэж хүсэж байна" гэлээ. 

ОБЕГ-ын дарга Г.Ариунбуян: "Өнөөдрөөс эхлэн арваннэгдүгээр сарын 17-ны 06:00 хүртэл бүх нийтийн бэлэн байдалд шилжсэн. Бүх нийтийн бэлэн байдлын зэрэг гэдэг нь гэрийн дэглэмд хөл хорио тогтоохыг хэлж байгаа. Үүнд хариуцлагатай хандаж байгаа иргэн, алсан байгууллагуудад талархал илэрхийлье.

Өнөөдрийн байдлаар аймаг, орон нутагт шуурхай штабуудаа байгууллаа. Тусгай чиг үүргийн 5,000 гаруй алба хаагчид үүрэг гүйцэтгэж ажиллаж байна. Иргэд тогтоолд заасан хүрээнд хүнсний зах, дэлгүүр, эмийн сангаас хэрэгцээт бараа бүтээгдэхүүнээ худалдан авч байгаа. Энэ худалдан авах явцад ШӨХТГ-аас хяналт шалгалт явуулж байна.

Үйл ажиллагаа явуулахыг зөвшөөрснөөс бусад байгууллагад арга хэмжээ авна. Мөн ажлын гурван хэсэг 20 гаруй тусгаарлах байранд шалгалт хийж байгаа" гэлээ.