Залуучууд “Унах дарга” гээд нэг хачин юм яриад байсан. Хэн нь хаанаас унаж үхэх юм бол гээд хүлээгээд байсан чинь манай хотын дарга унаад хагарчихдаг байна шүү. Нөгөө  усан оргилуураасаа болоод. Гурван тэрбум гаруй төгрөгөөр барьсан усан оргилуурынхаа нээлтийг хийх гэсэн чинь ус байсангүй. Тэгээд гал командын машинуудыг авчирч шланкаар усаа юүлсэн байгаа юм.

Энэ талаар УИХ-ын гишүүн асан Ц.Оюунгэрэл зарим нэг тооцоо хийж үзжээ. Усан оргилуурыг ажиллуулахын тулд дор хаяж 1000 тонн ус зөөнө, зардал нь 700 мянган төгрөг болно. 1000 тонн усаа бохирдонгуут нь соруулахад 8000.000 төгрөгийн зардал гарна. Уурших бүрт нь ус нэмнэ, өдөрт 50 мянган төгрөг... гэх мэтчилэн тооцсон байна. За тэр зардал зэрэг бага хэрэг. Хэрвээ бохироо зөөж дийлэхгүй бол саарал усан дотор нь бактер, вирус үржээд гаргасан зардлаасаа илүү аюул болно шүү хэмээн сэрэмжлүүлсэн байна.

Уг нь бол хотын дарга С.Амарсайхан анх нийслэлийн төв цэцэрлэгийг буулгаж, авто зогсоол, хөгжимт усан оргилуур энэ тэр барина гэж уралдаан зарлаж, төсөл сонгон шалгаруулахдаа л өмнөх Засаг даргаа баахан баалж, “Ус байхгүй газар нийтийн бие засах газар барилаа” хэмээн эргүү, мангараар нь дуудаж байсан. Тэгсэн өөрөө усаа таталгүй усан оргилуун барьчихсан байх ч шиг. Тэр гадна үзэмж, хотын өнгө төрх энэ тэр бол бүр өнгөрсөн хорвоо...

Уг нь ердөө 100-хан метрийн цаана, замын цаад талд MCS-ийн барьсан усан оргилуур бий л дээ. Ядахдаа тэднээс асууж болно доо, “хөгшөөн таанууд усаа яаж зохицуулаад байна” гэж. Ямар худаг ухав л гэж дээ.

Бүр Улаанбаатараас 2000 км-ын тэртээ Ховд аймаг хүртэл аймгийнхаа төв талбайд усан оргилууртай байна. Хамгийн гол нь тэндээс нь ус гарч байна.  Нүүрсээ хүрзээр, усан оргилуураа хувингаар зөөнө. Энэ одоо хэдэн он бэ?

20 тоннын цистернээр 1000 тонн ус гэдэг чинь багадаа 50 машин ус орох нь. Гашуунсухайтаар урагшаа гарч байгаа нүүрсний цуваанаас дутахааргүй юм болох нээ дээ.

Ер нь тэгээд зүв зүгээр байсан Төв цэцэрлэгийг устгаад, усан оргилуур бариад өг гэж хэн ч энэ хүнээс гуйсан юм байгаа юм. Устгуулахгүй гэж харин өмөөрч хамгаалсан, жагсч цугласан нийслэлийн иргэд харин олон байдаг. Ердөө арван алхмын наана, цаана, MCS-ийн барьсан усан оргилуур, хотын даргын бариулсан усан оргилуур хоёрын ялгааг нэг харчих. Нэгийг нь төсвийн мөнгөөр, нөгөөг нь хувийн компани өөрийн хөрөнгөөр барьсан.

Б.ЗАЯА