Татварын ерөнхий газраас 2019 онд НӨАТ-ын буцаан олголтоор 911.707 албан татвар төлөгч иргэнд 148.6 тэрбум төгрөгийн урамшуулал олгохоор болсон. 

Үүнээс хоёрдугаар сарын 11-ний өдрийн 10 цагийн байдлаар НӨАТ-ын тухай хуулийн нөхцөл шаардлага хангасан 882.814 татвар төлөгч иргэнд 144.3 тэрбум төгрөгийн урамшууллыг олгосон байна.

Сангийн сайдын баталсан “Нэмэгдсэн өртгийн албан татвар төлөгчийн худалдан авалтад төлсөн нэмэгдсэн өртгийн албан татварыг буцаан олгох журам”-ын 6.18-д заасны дагуу ажлын гурав хоногийн дотор Төрийн сангаас эцсийн байдлаар Татварын ерөнхий газарт мэдээллийг хүргүүлэх аж.

Мөн татварын шинэчлэлийн хүрээнд НӨАТ-ын урамшууллыг улирал бүр буцаан олгохоор болсон билээ. Энэ хүрээнд:

• Нэгдүгээр улирлын буцаан олголтыг дөрөвдүгээр сард,

• Хоёрдугаар улирлын буцаан олголтыг долоодугаар сард, 

• Гуравдугаар улирлын буцаан олголтыг 10 дугаар сард, 

• Дөрөвдүгээр улирлын буцаан олголтыг дараа оны нэгдүгээр сард багтаан олгоно.

Иймээс иргэд хувийн мэдээлэл зөрүүтэй эсвэл төлбөрийн баримтаа тухайн улиралдаа бүртгүүлж амжаагүй шалтгаанаар НӨАТ-ын буцаан олголтоо нэгдүгээр улиралдаа авч чадаагүй бол дараагийн улиралд өссөн дүнгээр буцаан олголтоо авах юм.

Иргэн та худалдан авсан бараа, ажил, үйлчилгээнийхээ татварын буцаалтыг бүрэн авч хууль ёсны эрх ашгаа хамгаалахын тулд төлбөрийн баримтаа заавал авч хэвшихийг Нийслэлийн татварын газар сануулж байна.