Өнөөдөр 2019 оны хоёрдугаар сарын 15-ны өдрийн Инчеон-Улаанбаатар чиглэлд хөөрөх гэж байсан EI-FGN бүртгэлийн дугаартай В767-300 агаарын хөлөгт тэсрэх бөмбөг тавьсан байж болзошгүй гэсэн мэдээлэл Инчеон нисэх буудлын Аюулгүй байдлын албанд ирсэн.
Энэ тухай МИАТ компанийн зүгээс Фейсбүүк хуудсаараа мэдээлсэн юм. Энэхүү нөхцөл байдлын улмаас гарсан нислэгийн сааталд МИАТ компанийн зүгээс хүлцэл өчиж, нөхцөл байдлын талаар тухай бүрт нь мэдээллэж байв.
БНСУ-ын Инчеон олон улсын нисэх буудал, тус улсын Онцгой байдлын удирдлагын төвөөс тус агаарын хөлөгт аюулгүй байдлын үзлэг хийх шаардлагатай хэмээн онгоцонд суудлаа эзэлсэн бүх зорчигч, ачаа тээшийг гарган шалгалт хийжээ.
МИАТ-аас дөнгөж сая "2019 оны 02 дугаар сарын 15-ны өдрийн Инчеон-Улаанбаатар чиглэлд хөөрөх гэж байсан EI-FGN бүртгэлийн дугаартай В767-300 маягын агаарын хөлөгт тэсрэх бөмбөг тавьсан байж болзошгүй гэсэн мэдээллийн дагуу БНСУ-ын Инчеон олон улсын нисэх буудлын аюулгүй байдлын албанаас тухайн агаарын хөлөгт аюулгүй байдлын үзлэг хийхэд ямар нэгэн тэсрэх бөмбөг илрээгүй байна. МИАТ компанийн нисэх бүрэлдэхүүн холбогдох газруудаас нислэгийг үргэлжүүлэх зөвшөөрлөө авсны үндсэн дээр удахгүй хөөрөх болно" гэсэн мэдээлэл өглөө.