/NHK/ Японы зүүн хойд нутгийн Фүкүшима мужид зургаан сартайгаас хоёр нас зургаан сар хүртэлх насны ойролцоогоор 40 хүүхэд оролцсон "уйланхай сумочин" тэмцээн болжээ. Өнгөрсөн ням гаригт Дэйт хотын иргэд энэ тэмцээнийг үзэхээр цугларсан байна. Уг арга хэмжээ нь хүүхдүүд эрүүл энх өсөхийн бэлгэдлийг агуулдаг гэнэ.
Хүүхдүүдэд жинхэнэ нэрнээс нь үүдэлтэй дэвжээний нэр өгсөн байв. Энэ нэрийг нь зарласны дараа тэд томчуудад тэврүүлэн хүчээ үзэхээр дэвжээ рүү гарлаа. Зарим хүүхдийг өргөмөгц уйлж эхлэв. Зарим нь ээжийгээ дуудан хашхирч, хөл гараа савчуулж байлаа. Гэтэл аймшигтай төрхтэй баг нүүрэнд нь ойртуулсан ч гэсэн гайхширсан харцаар эргэн тойрноо ширтээд огт уйлаагүй нярайнууд ч бий. Тэмцээний үеэр нярай хүүхдүүдийн гэр бүлийнхэн нь барилдааныг үзэж, зураг авч, инээлдэж байлаа.
Дэйт хотын нэг настай хүүхдийн эцэг нь "хүү минь маш ихээр уйлсан" гэж ярилаа. Уйлж чадаж байна гэдэг бол эрүүл байгаагийн шинж, хүү минь их идэж, сумо бөх шиг том биетэй болоосой гэж хүсэж байгаагаа нэмж хэлэв.
Найман сартай нярайгийн ээж нь ярихдаа, миний хүүхэд гэртээ байдаг шигээ их уйлсангүй, гайхширснаасаа болоод тэгтлээ уйлаагүй байх хэмээн ярилаа.
