/Reuters/ Европын Комиссын ерөнхийлөгч Урсула фон дер Лейен даваа гаригт "Европын Холбоо хилээ бэхжүүлэхийн зэрэгцээ Мароккод үзүүлэх дэмжлэгээ нэмэгдүүлнэ" гэлээ. Энэ нь өнгөрсөн долоо хоногт Испанийн Сеута хотод 50 мянга гаруй дүрвэгсэд эмх замбараагүй байдал дэгдээсэн явдал давтагдахгүй байхад чиглэх юм.

Өнгөрсөн пүрэв гаригаас эхлэн Африктай хиллэдэг Европын Холбооны хоёр хилийн боомтын нэг болох Испанийн Сеута хотод байдал хурцдаж, тус холбоо даяар түгшүүр төрүүлсэн билээ. 2015-16 оны шилжилт хөдөлгөөний хямралын үед нэг сая гаруй цагаачид, Сирийн дайнаас зугтсан олон хүмүүс Европт ирснээс хойш энэ нь Европын Холбооны хувьд хамгийн их маргаан дагуулсан улс төрийн асуудлуудын нэг болоод байна.

Энэхүү урсгал нь тус бүс нутаг даяар цагаачлалыг эсэргүүцэгч хэт барууны үзэлтэй намуудыг дэмжихэд хүргэж, хилийн хяналт, орогнол олгох журам, ачааллаа хуваалцах талаар олон жилийн турш өрнөж буй  маргааныг улам хурцатгасан юм.

Европын Холбоо нь хууль бусаар нэвтрэхийг оролдож буй дүрвэгсдийг хязгаарлахын тулд Хойд Африкийн орнуудтай шилжилт хөдөлгөөний асуудлаар гэрээ байгуулахад ихээхэн найдлага тавьж байна. "Марокко бол хулгайн замаар хил нэвтрэх, хууль бус шилжилт хөдөлгөөнтэй тэмцэх бидний хүчин чармайлтад чухал стратегийн түнш юм" гэж Урсула фон дер Лейен бичжээ.