Өнгөрсөн оны арванхоёрдугаар сард ЭХЭМҮ төвийн хүүхдийн тасагт ирсэн жирэмсэн эмэгтэйг угтах үйлчилгээний ажилтан төрөх тасаг руу явахыг зөвлөсөн ба жирэмсэн эмэгтэй хаяг байршил тодорхойгүйгээс замдаа буюу гадаа машинд төрсөн хэрэг гарсан билээ.
Уг хариуцлагагүй үйлдлээс улбаалан Эрүүл мэндийн сайд Д.Сарангэрэл албан даалгавар эмнэлгүүдэд хүргүүлсэн.
Албан даалгаварт, хүлээн авах, яаралтай тусламжийн тасгийн хаягийг монгол хэлээр, үгийн товчлолгүй гаргацтай бичих, шөнийн цагаар гэрэлтүүлэгтэй, харагдахуйцаар байрлуулах, мөн эмнэлгүүд жирэмсэн эмэгтэйд хүндрэл учруулахгүй, харьяалал харгалзахгүй тусламж үзүүлэхийг эрүүл мэндийн байгууллагуудад үүрэг болгосон.
Тэгвэл, ЭХЭМҮ төв иргэдэд зориулан төвийн байршил, чиглэлийг заасан гэрэлт самбарыг ашиглалтад оруулжээ.
Тус төвийн тусламж үйлчилгээг авахын тулд аль байр руу очих мөн өөрийн байгаа байршлаас аль зүгт явах талаарх мэдээлэл бүхий нийт найман самбарыг байршуулсан байна.
Яаралтай тусламжийг 24 цагаар үзүүлдэг тус эмнэлгийн хувьд харанхуйд харах боломжийг бүрдүүлэн мэдээллийн самбарыг гэрэлтэй байдлаар шийдсэн байна.
