Засгийн газрын өнөөдрийн хуралдаанаар 0-5 хүртэлх насны хүүхдээ эмнэлэгт болон гэрээрээ 3-5 хоног чөлөө авч асарсан эцэг, эхчүүдэд цалинтай чөлөө олгох тогтоол гаргалаа.
Өчигдөр Эрүүл мэндийн сайд Д.Сарангэрэл томуу, томуу төст өвчний дэгдэлтийн үед бага насны хүүхэдтэй эцэг, эхчүүдэд 3-5 хоногийн цалинтай чөлөө олгох саналыг Улсын онцгой комиссын хуралдааны үеэр гаргасан билээ.
Энэ талаар ЗГХМОНХХ-ийн дарга мэдээлэхдээ хувийн компани, ААН-үүдийг энэ тогтоолыг дэмжиж ажиллахыг уриалалаа.
Томуу, томуу төст өвчний дэгдэлт их байгаа учир Засгийн газар яаралтай хэлэлцэн уг тогтоолыг гаргалаа.
Мөн удахгүй сар шинийн баяр болох гэж байна. Энэ үеэр томуу, томуу төст өвчний дэгдэлт ихсэж, нөхцөл байдал нэлээн хүндэрч магадгүй тул бага насны хүүхдээ дагуулан гадуур гарахгүй, нэг нэгнээ тэвэрч үнсэхгүй байя гэсэн уриалгыг гаргаад байгаа.
Өнгөрсөн шинэ жилийн баярын дараа томуу, томуу төст өвчний дэгдэлт огцом нэмэгдсэн. Тиймээс хүүхдүүдээ цаг тухайд нь вакцинд хамруулах, дархлааг нь байнга дэмжих, дааруулахгүй байх, олон нийтийн газар дагуулж явахгүй байхыг мэргэжилтнүүдийн зүгээс зөвлөж байгаа юм.
