Өнөөдөр дэлхий нийтээрээ Олон улсын сувилагчдын өдрийг тэмдэглэж байна. Монгол Улсад одоогийн байдлаар 11 мянга гаруй сувилагч ажиллаж байгаа гэсэн албан бус тоо бий. Харин Ховд аймагт 700 орчим сувилагч ажиллаж байгаа бөгөөд тэдний дунд эрэгтэй сувилагч цөөн хэд бий. Эдгээр сувилагчид яаралтай тусламжийн болон мэс заслын тасгуудад хариуцлагатай, хүнд нөхцөлд үүргээ нэр төртэй биелүүлэн ажиллаж байна.
Эрүүл мэндийн салбарын тусламж үйлчилгээ нь зөвхөн эмч нарын ажил бус, сувилагч, эмнэлгийн бусад мэргэжилтнүүдийн хамтын ажиллагаанд тулгуурлаж хөгждөг цогц үйлчилгээ юм. Тиймээс цаашид сувилахуйн тусламжийг илүү мэргэшсэн түвшинд хүргэх, орчин үеийн шинэ технологи, инновацийг эрүүл мэндийн үйлчилгээ, сувилан асрах үйл ажиллагаанд нэвтрүүлэх, сувилагчдын ажлын ачааллыг бууруулах, мэдлэг ур чадварыг дээшлүүлэхэд онцгойлон анхаарах шаардлагатай байгааг өнөөдөр салбарын удирдлагууд онцлон тэмдэглэлээ.
Энэ өдөр эрүүл мэндийн салбарт үнэтэй хувь нэмэр оруулж буй бүх сувилагч нартаа талархал илэрхийлж, ажил хөдөлмөрт нь амжилт хүсье.
Эх сурвалж: Эрүүл мэндийн яам, Ховд аймгийн Эрүүл мэндийн газар
