Монгол Улсын хэмжээнд 2025 оны дөрөвдүгээр сард хэрэглээний бараа, үйлчилгээний үнэ өмнөх оны мөн үеийнхээс 8.6 хувиар өссөн байна. Энэ нь 2024 оны дөрөвдүгээр сарын инфляцын түвшнээс 2.9 нэгж хувиар өссөн үзүүлэлт болж байна.
Хүнсний барааны үнэ 6.8 хувиар, хүнсний бус барааны үнэ 9.4 хувиар, бусад барааны үнэ 6 хувиар, үйлчилгээний үнэ 17 хувиар нэмэгдсэн нь инфляцын өсөлтөд голлон нөлөөлжээ.
Хүнсний бүтээгдэхүүний үнийн өсөлтөд мах, махан бүтээгдэхүүний үнэ голлон нөлөөлсөн байна. Тухайлбал:
-
Мах, махан бүтээгдэхүүний үнэ 13.7 хувиар өсөхөд:
-
Үхрийн мах 13.2 хувиар,
-
Адууны мах 2.5 хувиар,
-
Хонь, ямааны мах 17.1 хувиар тус тус нэмэгдсэн байна.
-
-
Талх, гурил, будааны бүлгийн үнэ 3.9 хувиар өссөн нь талх, нарийн боовны үнийн өсөлт 5.9 хувь, гоймонгийн үнийн өсөлт 19.3 хувиар нэмэгдсэнтэй холбоотой.
Улаанбаатар хотод хэрэглээний бараа, үйлчилгээний үнэ 9.8 хувиар өссөн бөгөөд инфляцад бензин, түлшнээс бусад импортын барааны үнэ 2.6 нэгж хувь, мах, хатуу түлшнээс бусад дотоодын барааны үнэ 6.1 нэгж хувиар нөлөөлсөн байна.
Эдийн засагт нөлөөлж буй бараа бүтээгдэхүүний үнийн өөрчлөлтөөс дурдвал:
-
Үхрийн цул махны 1 кг дундаж үнэ 22,929 төгрөг болж, өнгөрсөн оныхоос 14.1 хувиар нэмэгджээ.
-
1-р зэргийн гурилын дундаж үнэ 2,229 төгрөг болж, өмнөх оны мөн үеийнхээс 9.1 хувиар буурсан байна.
-
АИ-92 бензиний дундаж үнэ 2,390 төгрөг байгаа нь 2023 оны дөрөвдүгээр сараас хойш өөрчлөгдөөгүй байна.
Бүс нутгийн хувьд:
-
Баруун бүсэд барааны бүлгийн үнэ 6.9 хувь,
-
Төвийн бүсэд хүнсний бүлгийн үнэ 7.9 хувь,
-
Улаанбаатар хотод үйлчилгээний бүлгийн үнэ 18.4 хувь, хүнсний бус барааны үнэ 10.9 хувиар өссөн нь хамгийн өндөр үзүүлэлттэй байна.
Аймгуудаас Булган аймагт инфляцын түвшин хамгийн бага буюу 4 хувь, Ховд аймагт хамгийн өндөр буюу 15.3 хувиар нэмэгдсэн байна.
Үндэсний статистикийн хороо хэрэглээний үнийн индексийн сагсыг шинэчлэн 2025 оны хоёрдугаар сараас эхлэн 418 нэр төрлийн бараа, үйлчилгээгээр бүрдүүлэн, 2023 оны дундаж үнийн суурьтайгаар хэрэглэж байгаа аж.
Эх сурвалж: Үндэсний статистикийн хороо
