Монгол Улсын Их Сургуулийн номын сангаас Үндэсний бичиг үсгийн баярын хүрээнд монгол бичгийн өв соёлыг таниулан сурталчлах зорилготой өдөрлөгийг өнөөдөр зохион байгууллаа. Энэхүү арга хэмжээг Өндөр гэгээн Занабазарын мэндэлсний 390 жилийн ойтой уялдуулан соёмбо үсгийн түүх, хэрэглээ, өв уламжлалыг оюутан, багш, судлаачдад таниулах зорилгоор зохион байгуулсан нь онцлог байв.
Өдөрлөгийн үеэр МУИС-ийн оюутнуудын дунд соёмбо үсгээр бичигдсэн болон орчуулагдсан сурвалж бичгийн талаар судалсан илтгэлийн уралдаан зарлаж, шилдгийг тодруулсан бол хичээлийн тэмдэглэлээ хамгийн сайхан хөтөлдөг оюутныг шалгаруулж урамшууллаа. Мөн соёмбо бичгийн онцлог, бүтээлийн жишээг харуулсан үзэсгэлэнг олон нийтэд дэлгэж, соён гэгээрүүлэх үйл ажиллагаа өрнүүлсэн юм.
Үүнээс гадна тус номын сангийн ховор номын сан хөмрөгт хадгалагдаж буй монголчуудын бичиг үсгийн түүх, соёлын үнэт баримт бичиг, судалгааны бүтээлүүдийг танилцуулсан байна. Үндэсний бичиг үсгийн баярыг жил бүрийн тавдугаар сарын эхний долоо хоногт тэмдэглэн өнгөрүүлдэг уламжлалын хүрээнд зохиогдсон энэхүү арга хэмжээ нь залуу үеийн бичиг үсгийн соёлын мэдлэгийг дээшлүүлэхэд хувь нэмэр оруулсан чухал үйл явдал боллоо.
