Дархан-Уул аймагт Монгол Улсын Ерөнхийлөгчийн 2025 оны хоёрдугаар сарын 24-ний өдрийн 25 дугаар зарлигаар төрийн дээд цол хүртсэн эрхмүүдэд зориулсан хүндэтгэлийн арга хэмжээ боллоо. Аймгийн Засаг дарга Б.Азжаргал гавьяат цол хүртсэн иргэдийг хүлээн авч, хүндэтгэл үзүүлэн баяр хүргэж, тэдний бүтээл туурвил, хөдөлмөр зүтгэлийг үнэлэн талархлаа илэрхийлэв.

Энэ удаа Дархан-Уул аймгаас гурван салбарын нэр бүхий төлөөлөл төрийн дээд цол тэмдгээр шагнагдсан юм. Үүнд:

• Монгол Улсын Урлагийн гавьяат зүтгэлтэн цолоор шагнагдсан Залуучууд театрын ерөнхий найруулагч М.Цогт нь 40 жилийн турш мэргэжлийн урлагийн байгууллагад тасралтгүй ажиллаж, театрын урлагийг орон нутагт хөгжүүлэхэд үнэтэй хувь нэмэр оруулжээ.

• Монгол Улсын Соёлын гавьяат зүтгэлтэн цолоор шагнагдсан Р.Батжаргал нь 2009–2020 онд аймгийн Боловсрол, соёл, урлагийн газрын даргаар ажиллаж, салбарын тогтвортой амжилтыг ханган ажилласан. Түүний санаачилсан “Хөгжлийн төлөө хамтдаа 1000 багш” хөтөлбөр БСШУЯ-ны шилдэг хөтөлбөрөөр шалгарч байжээ.

• Монгол Улсын Гавьяат багш цолоор Л.Сувданчимэг шагнагдсан нь сургуулийн өмнөх боловсролын салбараас Дархан-Уул аймагт төрөн гарсан анхны гавьяат багш болсон явдал байв. Тэрээр 39 жилийн хөдөлмөрийн туршлагаараа салбарт олон шинэ санаа, эерэг өөрчлөлт авчирсан шилдэг менежер хэмээн үнэлэгдэж байна.