Аймгийн Засаг даргын санаачилгаар “Эрүүл монгол хүн” үндэсний хөдөлгөөнийг дэмжин, нийтийн биеийн тамирыг хөгжүүлэх зорилгоор төрийн байгууллагуудын дунд нэг сарын хугацаатай “Алхалт-10000” аян эхэллээ.
Аяны нээлтийг өнгөрсөн бямба гарагт “Миний Монгол” цэцэрлэгт хүрээлэнгийн хөл бөмбөгийн талбайд зохион байгуулж, бүх шатны төрийн байгууллагын албан хаагчид идэвхтэй оролцов. Үйл ажиллагааны эхэнд өглөөний дасгал, шугаман бүжиг хийж, дараа нь аюулгүйн тойргоор тойрон алхсанаар “Алхалт-10000” аян зөвхөн төрийн байгууллагын хүрээнд бус нийт иргэдийг хамруулах, хамтдаа хөдөлгөөнд уриалах уриаг түгээсэн юм.
Аяны хүрээнд төрийн байгууллагууд өөрсдийн сонгосон өдөрт албан хаагчдаа долоо хоногт нэг удаа хамтдаа алхуулах бөгөөд энэ үед хувийн хэвшлийн байгууллага, иргэдийг татан оролцуулах чиглэлийг баримталж байна.
Эрүүл мэндийг дэмжих энэхүү алхалтын аян нь хөдөлгөөний дутагдал, суугаа амьдралын хэв маягийг өөрчлөх, ажил хэргийн ачаалал ихтэй төрийн албан хаагчдыг сэтгэлзүйн болон биеийн хувьд сэргээх, нийтийн биеийн тамирыг түгээн дэлгэрүүлэх чухал арга хэмжээ болж байна.
Эх сурвалж: Аймгийн ЗДТГ
