Монгол Улсын нийслэлийн ерөнхий боловсролын 48 дугаар сургуулийн “Гялбаа” хамтлагийн сурагчид Дэлхийн хөгжөөн дэмжигчдийн бүжгийн аварга шалгаруулах тэмцээнд амжилттай оролцож, эх орондоо алтан медаль, аваргын цомтой ирлээ. Тэднийг өнөөдөр сургуулийн багш, сурагчид баяр хөөртэй угтан авсан байна.

Тус хамтлагийн 24 тамирчин, хоёр дасгалжуулагчийн хамт 2025 оны дөрөвдүгээр сарын 19-нөөс 30-ны өдрүүдэд зохион байгуулагдсан “World Cup” болон “Дэлхийн цомын АШТ” гэсэн хоёр төрлийн олон улсын тэмцээнд Монгол Улсаа төлөөлөн оролцжээ. Эхний тэмцээнд финалист баг болж, дараагийн тэмцээндээ цацагтай бүжгийн төрлөөр алтан медаль, аваргын цом хүртсэн байна.

Хөгжмийн багш Н.Нандинцэцэгийн хэлснээр, энэ төрлийн спорт Монголд харьцангуй шинэ бөгөөд “Гялбаа” хамтлагийн энэхүү амжилт нь тус төрлөөр анхны алтан медальд тооцогдож буй. Хамтлагийн бүрэлдэхүүнд зөвхөн 48 дугаар сургуулийн сурагчид багтсан нь онцлог аж. Тэд өмнө нь БНСУ, БНХАУ-д болсон Азийн нээлттэй тэмцээнүүдээс алт, хүрэл медаль хүртэж байсан туршлагатай.

Хамтлагийн гишүүн Энхбатын Буд хэлэхдээ, “Бүх баг хамт олонтойгоо дэлхийн аваргад оролцож, алтан медаль авч, Монголын төрийн далбааг намируулсан нь үгээр хэлэхийн аргагүй бахархал төрүүлсэн” хэмээн сэтгэгдлээ хуваалцлаа.

Сурагчдын энэхүү ялалт нь зөвхөн сургууль, хамтлагийн төдийгүй Монгол Улсын нэр хүндийг олон улсын түвшинд өндөрт өргөсөн онцгой амжилт боллоо.

Эх сурвалж: МҮОНРТ, 48 дугаар сургууль