Булган аймгийн Хүүхэд, гэр бүлийн хөгжлийн газрын захиалгаар хэрэгжих “Жаргалант” зуслангийн шинэ хотхоны шав тавих ёслол зохион байгуулагдлаа. Энэхүү бүтээн байгуулалт нь 2024-2026 оны хооронд үе шаттайгаар хэрэгжих бөгөөд төсөл хэрэгжүүлэгчээр “Төсөв төсөл” ХХК шалгарч, барилгын ажлыг эхлүүлэхэд бэлэн болсон байна.

Төслийн эхний шат болох 2024 онд 1 тэрбум 622 сая төгрөгийн хөрөнгө оруулалтаар 300 хүүхдийн багтаамжтай хоолны заал, захиргаа аж ахуйн зориулалттай барилгыг ашиглалтад оруулжээ. Цаашид 2025-2026 онд улсын төсвийн хөрөнгө оруулалтаар нийт 9 хотхон барихаар төлөвлөсөн байна.

Жаргалант зуслан нь өнгөрсөн жил 383 амрагч хүүхдийг хүлээн авсан бол энэ жил зургаадугаар сарын 15-наас наймдугаар сарын 15-ны хооронд нэг ээлжиндээ 90 хүүхдээр тооцож, нийт 7 ээлж хүлээн авах бэлтгэлээ бүрэн хангасан талаар ХГБХХГ-ын ахлах мэргэжилтэн Г.Одончимэг мэдээлэв.

Энэхүү бүтээн байгуулалт нь орон нутгийн хүүхдүүдийн амралт, чөлөөт цагийг зөв боловсон өнгөрүүлэхэд чухал ач холбогдолтой бөгөөд орчин үеийн шаардлагад нийцсэн нөхцөлийг бүрдүүлэх зорилготой юм.

Эх сурвалж: Булган аймгийн ХГБХХГ