Улаанбаатар хотын төв цэвэрлэх байгууламжийг шинээр барих төслийн ажлын хэсгийн өргөтгөсөн хуралдаан өнөөдөр, 2025 оны 4 дүгээр сарын 3-нд боллоо.

Хуралдаанд ҮХУУЦ төлөвлөгөөг хэрэгжүүлэх ажлын хэсгийн гишүүд, төслийн нэгж, олон улсын хамтын ажиллагааны байгууллагуудын төлөөлөл болон холбогдох төрийн байгууллагуудын удирдлагууд оролцлоо. Үүнд, Японы мэргэжилтэн, Улаанбаатар хотын үйлдвэрийн хаягдал усны хяналтын чадавхийг бэхжүүлэх төслийн удирдагч Окүда Итарү, Ажлын хэсгийн дарга О.Мөнхбаяр, төслийн зохицуулагч Г.Чулуунбат, УСУГ, Хотын инженерийн дэд бүтцийн газар, Монголын Мянганы Сорилтын сан, ХУДБҮ төслийн удирдлагууд оролцож, хамтран ажиллаж байна.

Хуралдааны үеэр шинээр баригдаж буй төв цэвэрлэх байгууламжийн төслийн гүйцэтгэл, тулгамдаж буй асуудлууд, техник технологийн шийдэл, бүтээн байгуулалтын явц болон цаг хугацааны хуваарийн хэрэгжилт зэрэгт анхаарал хандуулан, шийдэл хайсан хэлэлцүүлэг өрнүүлжээ.

Шинэ байгууламжийг барьж дуусгах нь Улаанбаатар хотын ариутгах татуургын системийг шинэчлэх, үнэргүйжүүлэлт, хаягдал усны дахин боловсруулалт, хотын экологийн тэнцвэрийг хангахад чухал ач холбогдолтой бөгөөд төслийн хэрэгжилт нь олон улсын болон дотоодын олон талын хамтын ажиллагаанд тулгуурлаж байна.

Эх сурвалж: Улаанбаатар хотын Захирагчийн ажлын алба