Улсын Их Хурлын даргын 95 дугаар захирамжаар байгуулагдсан Ашигт малтмалын тухай хуулийн шинэчилсэн найруулгын төсөл боловсруулах үүрэг бүхий ажлын хэсгийн хуралдаан 2025 оны дөрөвдүгээр сарын 1-ний өдөр боллоо. Тус ажлын хэсгийг УИХ-ын гишүүн Н.Наранбаатар ахалж байгаа бөгөөд хуралдаанд УИХ-ын гишүүн Б.Мөнхсоёл, Ж.Золжаргал, Д.Батлут, П.Мөнхтулга, Л.Мөнхбаясгалан, Ц.Мөнхбат, Г.Дамдинням, Г.Ганбаатар, М.Бадамсүрэн, С.Замира, Ж.Баясгалан, Б.Уянга нар оролцов.

Хуралдааны эхэнд Хууль зүйн ухааны магистр, хуульч, өмгөөлөгч Р.Хатансайхан “Ашигт малтмалын тухай хуулийн хэрэгжилтийн үр дагаврын үнэлгээ, судалгааны тайлан”-г танилцууллаа. Тэрбээр тусгай зөвшөөрөл олголт, түүний эрх зүйн зохицуулалт Үндсэн хуулийн зорилгод хэр нийцэж байгаа, иргэн, хуулийн этгээдийн болон орон нутгийн оролцоо хэрхэн хангагдаж байгаа, ашигт малтмалын болон холбогдох хуулиудын уялдаа холбоо, системчлэл ямар байгааг судалсныг онцолсон юм.

Судалгааны үр дүнд тулгуурлан гишүүд асуулт асууж, хариулт авч санал бодлоо солилцсон бол дараа нь Аж үйлдвэр, эрдэс баялгийн яамнаас Ашигт малтмалын тухай хуулийн шинэчилсэн найруулгын үзэл баримтлалын талаар мэдээлэл хүргэлээ.

Эх сурвалж: Улсын Их Хурлын Хэвлэл мэдээллийн газар