XXI-р зууны хамгийн нэр хүндтэй дизайнер, загварын ертөнцийн домог болсон, гэрэл зурагчин, нийтлэлч Карл Лагерфельд 85 насандаа нойр булчирхайн хавдар өвчний улмаас өнгөрсөн хоёрдугаар сард Парис хотноо таалал төгссөн юм.
Chanel, Fendi брэндүүдийн ерөнхий дизайнераар ажиллаж байсан Герман гаралтай загвар зохион бүтээгч Карл Лагерфельд Chanel брэндийн бүтээлч захирлаар 36 жилийн турш ажиллах хугацаандаа бүхэл бүтэн эрин үеийг тодорхойлж, загварын салбарыг өөрчилсөн юм.
Карл Лагерфельдийн намтар номыг загварын сэтгүүлч, зохиолч Уиллиам Мидллтон бичихээр болсон байна. Тэрээр WWD сэтгүүлд өгсөн ярилцлагадаа "Карлын тухай энгийн нэг намтар бус харин түүний тухай маш сонирхолтой түүхийг өгүүлсэн намтар номыг бичих болно. Кино урлаг, хөгжим, уран зураг, дизайн, архитектур гээд бүхий л салбартай холбогддог Карл шиг хүн бараг л үгүй, энэ тухай ч бас дурдах нь зүйтэй" хэмээжээ.
Уиллиам Мидллтон 1995 онд анх Карл Лагерфельдтэй танилцаж байсан бөгөөд тухайн үедээ түүний тухай ном бичих санал тавьсан ч Карл татгалзаж байсан байна. Карл Лагерфельдийн намтар ном 200-300 хуудастай байх ба 2021 онд хэвлэгдэхээр төлөвлөгдсөн гэнэ.
